Qazaqstan «Junior Eurovision» dodasyna osymen besinshi ret qatysty
Armenıa astanasy Erevan qalasynda ótken «Junior Eurovision-2022» halyqaralyq án baıqaýynda fransıalyq ónerpaz jeńimpaz atandy, dep habarlaıdy Almaty-akshamy.kz QazAqparatqa silteme jasap.
Atalǵan óner saıysynda Qazaqstan atynan Davıd Charlın óner kórsetti. Ol sahnaǵa úshinshi bolyp shyǵyp, joba úshin arnaıy jazylǵan «Jer-Ana» atty ánin oryndady.
Daýys berý barlyq qatysýshylar óner kórsetip bolǵannan keıin bastalyp, 15 mınýt boıyna jalǵasty. Baıqaý nátıjesi ulttyq júrıdiń baǵalaýy men áleminiń 178 eliniń halqy bergen onlaın-daýys qorytyndysy boıynsha shyǵaryldy. Oǵan sáıkes, fransıalyq ánshi Lıssandro «Oh Maman!» týyndysymen jeńiske jetti. Ekinshi oryndy Armenıa eliniń qatysýshysy Nare ıelense, grýzıalyq ónerpaz Marıam Bıgvava úshinshi orynǵa turaqtady.
Al qazylar alqasy qazaqstandyqtyń Davıd Charlınniń ónerine - 5, kórermender - 42 bal berip, jalpy esepte 47 upaı jınady. Osylaısha, Qazaqstan «Junior Eurovision-2022» halyqaralyq án baıqaýynda 15-oryndy ıelendi.
Án baıqaýynyń tikeleı translásıasy «Habar» telearnasynyń efırinde, sondaı-aq Junior Eurovision-niń YouTube-arnasynda júrgizildi.
Aıta keteıik, Qazaqstan «Junior Eurovision» dodasyna osymen besinshi ret qatysty. Bıyl án baıqaýynda elimizden bólek, 15 eýropalyq memlekettiń jas ánshileri baq synady.
Eske salsaq, 2018 jyly bul baıqaýǵa Qazaqstan atynan alǵash bolyp jas ánshi Danelıa Týleshova qatysyp, 6-oryn ıelengen bolatyn. 2019 jyly jalpy daýys berý nátıjesinde Erjan Maksım 2-júldeli orynǵa ıe boldy. 2020 jyly Qaraqat Bashanova da 2-orynǵa taban tiredi. Byltyr Qazaqstannan Beknur Jánibekuly men Álınur Hamzın qatysyp, 19 eldiń ishinen 8-orynǵa turaqtaǵan bolatyn.