Alaıda naǵyz damyǵan el bolamyz desek, saıası reformalarmen shektelip qalmaýymyz kerek. Osy jumysty túbegeıli jáne jan-jaqty áleýmettik-ekonomıkalyq reformaǵa ushtastyrý qajet. Bul týraly Parlament palatalarynyń birlesken otyrysynda Qazaqstan halqyna Joldaýyn jarıalaǵan Memleket basshysy Qasym-Jomart Toqaev
«Qazir álemde geosaıası ahýal ýshyǵyp tur. Soǵan qaramastan, el ekonomıkasynyń negizgi baǵyttary boıynsha kórsetkishter ósti. Byltyr Qazaqstannyń ishki jalpy ónimi 104 trıllıon teńge boldy. Elimizge 28 mıllıard dollar tikeleı shetel ınvestısıasy tartyldy. Bul – rekordtyq kórsetkish. Syrtqy saýda-sattyq buryn bolmaǵan deńgeıge, ıaǵnı 136 mıllıard dollarǵa jetti. Onyń 84 mıllıardy – eksport. Syrtqy qorymyz 100 mıllıard dollarǵa jýyqtady», dedi Memleket basshysy.
Sonymen qatar ekonomıka turaqtylyǵy jóninde sóz etti.
«Bul, eń aldymen, ekonomıkalyq turaqtylyǵymyzdyń asa mańyzdy kepili ekeni sózsiz. Árıne, basqa elder de qarap otyrǵan joq, olar da alǵa qaraı umtylyp, damýda. Bir sózben aıtqanda, jahandyq ekonomıka jáne halyqaralyq eńbek naryǵy túbegeıli ózgerýde. Tehnologıalyq báseke qyzyp tur. Barlyq jerde resýrstar úshin talas júrip jatyr. Klımattyń ózgerýi, azyq-túlik qaýipsizdigi jáne demografıalyq turǵydan ornyqty damý eń ózekti máselege aınaldy. Bir sózben aıtqanda, adamzat tarıhynda buryn-sońdy bolmaǵan syn-qaterler men túbegeıli ózgerister dáýiri bastaldy. Osyndaı asa mańyzdy shaqta zor ekonomıkalyq serpilis jasaýǵa elimizdiń tolyq múmkindigi bar. Ol úshin biz birtindep jańa ekonomıkalyq úlgige ótýimiz kerek. Bul jumysty batyl júrgizýimiz qajet. Basty maqsat – qaǵaz júzindegi bıik jetistikterge qol jetkizý emes, shyn máninde halyqtyń turmys sapasyn jaqsartý bolýǵa tıis», -dedi Qasym-Jomart Toqaev.