2023 jyly 2021 – 2025 jyldarǵa arnalǵan kásipkerlikti damytý jónindegi ulttyq joba sheńberinde «Alǵashqy jumys orny» jobasy boıynsha 9 970 adam jumysqa ornalastyryldy, dep habarlaıdy almaty-akshamy.kz
Jobaǵa qatysýshylardyń 61,6 %-y (6144 adam) áıelder. Osy baǵyt boıynsha 2023 jyly jalpy 10 myń adamdy jumysqa ornalastyrý josparlanǵan bolatyn. «Alǵashqy jumys orny» jobasy boıynsha jumysqa ornalasqandardyń eń kóp sany Túrkistan (2 130 adam), Almaty (589 adam), Jambyl (574 adam) oblystarynda jáne Shymkent qalasynda (1 852 adam) baıqalady.
«Alǵashqy jumys orny» jobasy eńbek jolyn endi bastaǵaly júrgen jumyssyz jastarǵa arnalǵan. Jobaǵa qatysý úshin mansap ortalyǵyna ótinish berý qajet.
Jobaǵa jalaqysy boıynsha merzimi ótken bereshegi joq jáne bir jyldan astam jumys isteıtin salyq jáne basqa da áleýmettik aýdarymdardy únemi aýdaratyn barlyq menshik nysanyndaǵy kásiporyndar men uıymdar jumys berýshi retinde qatysa alady.
«Alǵashqy jumys orny» jobasyna qatysý uzaqtyǵy 18 aıdan aspaıdy, bul kezeń azamattyń eńbek ótiline esepteledi.
«Alǵashqy jumys orny» jobasyn qarjylandyrýdy jergilikti búdjet qarajaty esebinen halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organ júzege asyrady jáne jobaǵa qatysýshylarǵa jalaqy tóleýdi qamtıdy.
Jobaǵa qatysýshynyń jalaqy mólsheri ekologıalyq ústemeaqylar boıynsha tólemderdi qospaǵanda, salyqtardy, mindetti áleýmettik aýdarymdardy, paıdalanylmaǵan eńbek demalysy úshin ótemaqylardy jáne banktik qyzmetterdi eskere otyryp, aıyna keminde 30 aılyq eseptik kórsetkishti quraıdy (2023 jyly – 103 500 teńge, al 2024 jyly – 110 760 teńge).
«Alǵashqy jumys orny» jobasyna qatysý merzimi aıaqtalǵannan keıin jumys berýshi qatysýshyny keminde 12 aı merzimge turaqty jumys ornyna ornalastyrýǵa mindetti.
Qatysýshylar jobanyń oń nátıjelerimen bólisýde.
«2022 jyly qalalyq jumyspen qamtý ortalyǵyna júgingen edim, onda maǵan «Alǵashqy jumys orny» jobasyna qatysý usynyldy. Barlyq qajetti qujattardy jınaǵannan keıin «BOLASHAK KIDS» JSHS balabaqshasyna medbıke bolyp jumysqa ornalastym. Baǵdarlama aıaqtalǵannan keıin, 2024 jyldyń qańtarynda óz mamandyǵym boıynsha osy mekemege turaqty jumys ornyna resmı túrde ornalastyryldym», – dep bólisti Taraz qalasynyń turǵyny Baǵlan Qýanyshbaı.
2024 jylǵy 1 aqpandaǵy jaǵdaı boıynsha «Alǵashqy jumys orny» jobasy aıasynda 884 adam jumysqa ornalastyryldy. Bıyl jalpy 8 731 adamdy jumysqa ornalastyrý josparlanýda.