Mádenıet jáne aqparat mınıstrligi turǵyndardan kelip túsken shaǵymdar negizinde LGBTQ+ saıtyn tekserip, monıtorıń barysynda balalardyń densaýlyǵy men damýyna zıan keltiretin aqparatty ornalastyrýǵa qatysty zań buzýshylyqtardy anyqtady, dep jazady almaty-akshamy.kz KazFace.kz-ke silteme jasap.
Dástúrli emes seksýaldyq baǵytty nasıhattaıtyn veb-saıtqa qatysty turǵyndar narazylyq bildirip, petısıa bastaǵan edi. Qoǵamdyq pikirdi eskergen quzyrly organ aqparat kózin tekserip, oǵan tyıym salý sebebin túsindirdi.
Balalardyń quqyqtaryn qorǵaý jónindegi ýákiletti organ olardyń psıho-jastyq erekshelikterin, teris áserin eskerip, el turǵyndary arasynda LGBT qozǵalysynyń ıdeıalaryn taratatyn ınternet-resýrstarǵa qoljetimdilikti shekteý qajet dep sanady. Mınıstrlik aqparattyq ortany, qazaq qoǵamynyń tarıhy men dástúr sabaqtastyǵy, memlekettiń mádenı qundylyqtaryn, sondaı-aq balalardy durys tárbıeleý máselesin jan-jaqty saraptap, osyndaı sheshimge kelgenin aıta ketýimiz kerek.
«Balalardy densaýlyǵy men damýyna zıan keltiretin aqparattan qorǵaý týraly» Zańynda balalarǵa tyıym salynǵan aqparat erekshe seksýaldyq jáne erotıkalyq sıpattaǵy, Qazaqstan Respýblıkasynyń ózge de zańdarymen balalar arasynda taralýyna tyıym salynǵan málimetterdi qamtıdy.
Sonymen qatar «Bala quqyǵy týraly» zańda pornografıalyq aqparatty taratatyn, balalarǵa zıandy áser etetin jáne quqyq buzýshylyq jasaýǵa yqpal etetin buqaralyq aqparat quraldaryn paıdalaný da zańmen jaýapkershilikke tartylyp, osy mazmundaǵy aqparatty taratýǵa tyıym salynǵan», delingen mınıstrlik habarlamasynda.