QR Úkimetiniń otyrysynda aǵymdaǵy sý tasqyny jaǵdaıy, sondaı-aq kóktemgi maýsymǵa jáne bolýy múmkin tótenshe jaǵdaılarǵa daıyndyq sharalary talqylandy, dep habarlaıdy almaty-akshamy.kz
Tótenshe jaǵdaılar mınıstri Shyńǵys Árinov búginde respýblıkada sý tasqyny jaǵdaıy turaqty ekenin aıtty. Bul rette vedomstvo jergilikti atqarýshy organdarmen birlesip sý tasqyny kezeńine daıyndyq boıynsha qajetti is-sharalar keshenin ótkizdi.
Atap aıtqanda, «Kóktem» respýblıkalyq komandalyq-shtabtyq oqý-jattyǵý sheńberinde basqarý organdarynyń kúshteri men quraldarynyń naqty daıyndyǵy tekserildi. Halyqty qulaqtandyrý pysyqtaldy, zardap shekken azamattardy jınaý pýnktteri daıyndaldy.
- Budan bólek, eldi mekenderde ýaqytsha bógender salý jáne úıemeleý (114 km), aryqtardy, kanaldardy (1 904 km), sondaı-aq avto jáne temir joldardaǵy sý ótkizý qurylystaryn tazartý (5 002 dana) naqty túrde júzege asyryldy. Eldi mekenderden 10,5 mln tekshe metrden astam qar shyǵaryldy.
- Kóktem maýsymyna naqtylanǵan gıdroboljaý boıynsha ekologıa jáne tabıǵı resýrstar mınıstri Erlan Nysanbaev, sý qoımalaryn tasqyn sýdy qabyldaý jáne jınaqtaýǵa daıyndaý týraly sý resýrstary jáne ırrıgasıa mınıstri Nurjan Nurjigitov, avto jáne temir joldardyń jaǵdaıy boıynsha kólik mınıstri Marat Qarabaev baıandady.
Sondaı-aq Shyǵys Qazaqstan, Aqtóbe jáne Atyraý oblystarynyń ákimderi aldaǵy sý tasqyny kezeńine daıyndyq sharalary týraly málimet berdi.
Premer-Mınıstr buǵan deıin óńirlerde sý tasqynyna qarsy barlyq is-sharalardy sapaly iske asyrý qajettigi týraly birneshe ret tapsyrmalar berilgenin atap ótti. Alaıda memlekettik organdar men ákimdikter tıisti sharalardy tolyq kólemde qabyldaǵan joq.
«Nátıjesinde 218 is-sharanyń 92-si osy ýaqytqa deıin oryndalmaı otyr. Jumysqa bulaısha selqos qaraýǵa bolmaıdy. Tótenshe jaǵdaılar mınıstrine josparlanǵan is-sharalardyń oryndalmaýyna jol bergen ortalyq jáne jergilikti memlekettik organdardyń laýazymdy tulǵalarynyń jaýapkershiligi týraly usynystar engizýdi tapsyramyn», — dedi Oljas Bektenov.
Ol qalyń qar men jańbyr da qaýipti arttyra túsetinin atap ótti. Bul rette jekelegen óńirlerde qar shyǵarýǵa arnalǵan qarajat tek iri qalalar men oblys ortalyqtaryna bólinedi. Al aýyldyq eldi mekenderde qar shyǵarý jumystary nazardan tys qalyp otyr.
Onyń aıtýynsha, eldi mekenderdiń kóshelerin sý basyp qalý jáne birqatar óńirlerde joldardy shaıyp ketý faktileri qazirdiń ózinde tirkelip otyr. Jalpy 217 eldi mekende tasqyn qaýpi saqtalýda.
«Mundaı problema eldi mekenderdiń kópshiliginde jyldan-jylǵa qaıtalanyp keledi. Mysaly, Qostanaı oblysyndaǵy Qaramyrza aýyly sońǵy 4 jyl boıy qar sýynyń qursaýynan shyǵa almaı otyr. Bıyl da eldi mekenge qaýip tónýde. Joldardyń sý basyp qalýyna baılanysty Aqmola oblysynda Iagodnoe, Qostanaı oblysynda Ekidiń, Aqtóbe oblysyndaǵy Oımaýyt, Jaryq, Ótek jáne Qumtoǵaı aýyldarymen jyl saıyn qatynas úzilip qalady», — dedi Oljas Bektenov.
Úkimet basshysy biraz sharýa ákimdikterdiń naqty jumysyna baılanysty ekenin atap ótti. Osyǵan baılanysty ol aryqtardy, jaýyn-shashyn kárizderin ýaqtyly tazartý, ýaqytsha bógetter salý jáne eldi mekenderde topyraq úıindilerimen bekitý jumystaryn qamtamasyz etýdi tapsyrdy.
«Tótenshe jaǵdaılar mınıstrligi jyl saıyn «Kóktem» respýblıkalyq komandalyq-shtabtyq oqý-jattyǵýy sheńberinde sý tasqyny kezeńine ázirlik barysyn tekseredi. Barlyq óńirler sý tasqynyna tolyq daıynbyz dep baıandaıdy. Al saıyp kelgende turǵyndar jáne sý basqan ǵımarattar men ınfraqurylym zardap shegedi. Iaǵnı, bul oqý-jattyǵýlar formaldy túrde ótkiziletinin, al daıyndyq qaǵaz júzinde ǵana qalatynyn kórsetedi. Biz pármendi sharalar qabyldaýymyz qajet», — degen Oljas Bektenov, oqý-jattyǵý ótkizý formatyn qaıta qaraýdy tapsyrdy.
Premer-Mınıstr Tótenshe jaǵdaılar mınıstrligine ákimdiktermen birlesip, arnaıy jáne ınjenerlik tehnıkany shoǵyrlandyrýy, bıznespen olardyń tehnıkasyn rezerv retinde paıdalaný týraly kelisimge kelýdi, asa qaýipti ýchaskelerdiń mańynda qajetti materıaldar qoryn qamtamasyz etýdi mindettedi.
«Kólik qatynasy úzilip qalýy múmkin eldi mekenderdi aldyn ala aıqyndap, ondaǵy azyq-túlik pen dári-dármektiń qajetti qoryn daıyndaý qajet», — dep atap ótti ol.
Sonymen qatar Oljas Bektenov halyqty sý tasqyny qaýpi, sý basý jáne evakýasıalaý kezindegi is-qımyl erejeleri týraly keńinen habardar etý jumystaryn bastaýdy jáne halyqpen naqty keri baılanys ornatyp, olardyń kómek kórsetý týraly ótinishterin birden qaraýdy, sondaı-aq joldar men kópirlerdiń jaǵdaıyna táýlik boıy monıtorıń júrgizýdi tapsyrdy.