Qaırat Nurtastyń áıeli tórt balasymen baspanasyz qaldy.
Aktrısanyń jazýynsha, ony qurylys kompanıasynyń negizin qalaýshy Dılára esimdi áıel taqyrǵa otyrǵyzyp ketken, dep habarlaıdy aqshamnews.kz
Juldyz Ábdikárimova Instagram-daǵy paraqshasynda óziniń 4 balasymen baspanasyz qalǵanyn aıtty.
«2021 jyly «TUMARGrandVillage» kompanıasynan úı alǵanymdy habarlap edim. Sol jyly balalarym «Anashym, jer úıge kósheıikshi! Ózimizdiń aýlamyz bolsa, baqshasyna jemister egeıik» dep surady. Bul oı maǵan da unady. Sol sátten bastap úı izdeýge kiristim. Óz páterimdi satýǵa shyǵaryp, tez arada kóshkim keldi. Bar oıym úıimdi satyp, jer úı salý nemese satyp alý boldy. Astanadaǵy kotej salatyn birneshe kompanıalarǵa da bardym. Sol izdeniste júrgende qurylys kompanıasynyń negizin qalaýshy Dılára esimdi kelinshekpen tanystym. Ol maǵan «Sen satýǵa qoıǵan páterińdi meniń inim Dıardyń atyna jazyp beresiń. Biz saǵan qalashyqtan 1 jylda eki qabatty jer úı salyp beremiz. Al oǵan deıin sen páter jaldap turarsyń» dedi. Men kelise kettim. Oıymdaǵy úıdiń tabylǵanyna qýanǵanym da ras, - dep jazdy Juldyz Ábdikárimova.
Alaıda sodan beri arada 2 jyl ótken jáne ol balalarymen páterden-páterge kóship sharshaǵan.
«2024 jyldyń kókteminde meniń úıimniń jaqyn arada bitpeıtinin túsinip, Dıláranyń aldyna bardym. Budan artyq kúte almaıtynymdy jetkizip, óz úıimdi qaıtaryp berýin suradym. Sol kezde ol meniń páterimdi bankke kepildikke tikkenin estirtip, ol úıde taǵy bir inisi Ábilhan otbasymen turyp jatqanyn, qaıtaryp bermeıtinin aıtty. Jaqsy oǵan da kóndim, mynaý bitpeı turǵan jer úıimdi ózim aıaqtaıyn, sonyń qujatyn bershi dedim. Ákimdikten obektini paıdalanýǵa qabyldaý aktisin jasatpaq boldym. Biraq soǵylyp jatqan úıge de, jerge de qujat bermedi, - deıdi ol.
Aıtýynsha, bul úıdi «Agrarlyq kredıttik korporasıanyń» kepildigine salyp jibergen.
«Bir qyzyǵy, aýdandyq sotqa bararda Dılára jeńiletinimdi aıtty. Men Qazaqstan Respýblıkasynyń azamatshasy retinde quqyǵym taptalyp, aldanyp jatqandyǵym týraly polısıaǵa shaǵym túsirdim. Alaıda olar is qozǵamady. Zań boıynsha aýdandyq sotqa shaǵymdandym. Sot sheshimi meniń paıdama sheshilmegendikten, qalalyq sottyń apelásıalyq alqasyna shaǵym túsirýge májbúr boldym. Men Qazaqstannyń ádil sot júıesine senemin, – dep jazdy Juldyz Ábdikárimova.