Elimizde psıhıatrlarǵa kómekke júginetinder kóbeıdi. Stasıonarlarda pasıent kóp.
Júıkesi juqarǵan jurttyń basym bóligi Astana qalasy men Abaı, Shyǵys Qazaqstan oblystarynda tirkelgen, dep habarlaıdy aqshamnews.kz
Mamandardyń aıtýynsha, psıhıkalyq densaýlyqqa beı-jaı qaraýǵa bolmaıdy. Saldary aýyr bolýy múmkin.
Resmı málimetterge qarasaq, elimizde bıyl psıhıatrıalyq stasıonarlardyń jumysy 12 paıyzǵa artqan. Jarty jylda osy saladaǵy mamandardyń qyzmet kórsetýine 14 mlrd teńge jumsalǵan.
Elde 202 myńnan astam adam psıhıkalyq aýrýmen dáriger baqylaýynda. Olardyń basym bóligine "psıhıkalyq damýy tejelgen" dıagnozy qoıylǵan. Naýqastardyń kóbi Astana qalasy men Abaı jáne Shyǵys Qazaqstan oblystarynda tirkelgen.
"Bıyl 1-qazanǵy statısıkany alsaq, 202 myń adamnan astamy dınamıkalyq baqylaýda turdy. Bul degenimiz 3,1 paıyzǵa adam sany ósti degen sóz. QR boıynsha, óńirlerde biz 1-shilik aýrýshańdylyqty aıtýymyz kerek. Bu jerde eń birinshi orynda Astana qalasy tur. Astanada shamamen 100 myń adamǵa shaqqanda 110 adamǵa teń. Kelesi Abaı oblysy, shamamen 70 adam", -dedi QR DSM "Respýblıkalyq psıhıkalyq densaýlyq ǵylymı-praktıkalyq ortalyǵy"bas dırektorynyń orynbasary Nábı Esimov.
Psıhıatrlar da sońǵy ýaqytta shaǵymdanatyn naýqastardyń kóbeıgenin aıtady. Kúızeliske túskenderdiń túrli deńgeıi bar. Adam birneshe apta eshnársege zaýqy bolmaı, minez-qulqynyń qatty ózgergenin baıqasa, psıhologqa nemese psıhıatrǵa qaralýy kerek. Áıtpese, beısanadaǵy prosester asqynyp, psıhologıalyq patologıalyq aýrýlarǵa ákelýi ábden múmkin deıdi mamandar.
"Kóńil kúıiniń buzylýy, povedenıe deımiz, minez-qulqynyń ózgerýine baılanysty júginip jatqan naýqastar bar. Osyndaı jaǵdaı 2 aptadan asyp bara jatsa, mindetti túrde psıhıatr mamanyna júginý kerek", -deıdi psıhıatr Anar Tastembekova.
Al áleýmettanýshylardyń aıtýynsha, psıhologtarǵa kóbine orta jastaǵy azamattar men jastar jıi júginedi eken. Qoǵamdaǵy bul ózgeristiń sebepterin de atap ótti.
"Áleýmettik jelilerdiń áserinen kóp adamda jaqsy ómir súrýge degen umtylys baıqalady. Ózin ózi damytý degen, bylaı aıtqanda bul qajettilik pa nemese ol trendpen kelgen nárse ma, biraq adamdardyń barlyǵy sol baǵytta damýda. Óńirlerde ol nárse azdap kezdesedi. Sebebi ol jaqta mamandar da az. Óz ınstagramyn júrgizip jatqan ekspertter de az",- dedi áleýmettanýshy Áıgerim Jaqypbek.
Mentaldy buzylýǵa – áleýmettik jelige táýeldilik, ekonomıkalyq qıyndyqtar, mádenı ózgerister, tipti jahandyq daǵdarys ta sebep deıdi mamandar. Álemde stresstiń joǵary deńgeıiniń de áseri bar.