Úkimet otyrysynda Premer-mınıstrdiń orynbasary Qanat Bozymbaevtyń Ulytaý oblysyndaǵy «Jomart» kenishindegi apattyń sebepterin tekserý jáne qaza tapqandardyń otbasylaryna kómek kórsetý jónindegi Úkimettik komısıa jumysynyń barysy týraly baıandamasy tyńdaldy.
Osy jyldyń 17 aqpanynda Qazaqmys korporasıasynyń «Jomart» kenishiniń shahtasynda apat boldy. 7 adam qaza tapty. Bul rette 402 adam óz betinshe evakýasıalandy, dep habarlaıdy aqshamnews.kz Úkimettiń Telegram-kanalyna silteme jasap.
Atalǵan fakti boıynsha sotqa deıingi tergeý bastaldy. Apat ornynda Tótenshe jaǵdaılar mınıstrliginiń aýmaqtyq jedel shtaby ashyldy. Senim telefony jelisine 23 qońyraý tústi. Premer-mınıstrge Úkimettik komısıa apattyń sebepterin tergeý boıynsha jumysty bastaǵany, tıisti saraptamalar júrgiziletini baıandaldy.
Aldyn ala málimetter boıynsha shahtada tabıǵı gaz jarylǵan. Komısıa basshysy men músheleri apat bolǵan jerdi qarap, qaza tapqandardyń otbasylarymen kezdesý ótkizdi. Qazir shahtada jumys toqtatyldy. Eki arnaıy komısıa quryldy: bireýi apattyń sebepterin anyqtaýy kerek, ekinshisi qaýipsizdik erejeleriniń buzylǵanyn anyqtaıdy. Komısıalar óz jumysyn 10 kún ishinde aıaqtaýǵa tıis.
Memleket basshysynyń tapsyrmasy boıynsha qaza tapqandardyń otbasylaryna qajetti qoldaý sharalary kórsetiledi. Sondaı-aq Qazaqmys korporasıasy ujymdyq shartqa sáıkes kómek kórsetedi, onyń ishinde jerleýdi uıymdastyrý, jyldyq ortasha jalaqynyń 10 eselengen tólemi, balalardyń oqý aqysyn tóleý, qaza tapqan qyzmetkerlerdiń nesıeleri men qaryzdaryn óteý boıynsha kómek túrleri bar. Budan basqa, qoldanystaǵy zańnama aıasynda kenshiler otbasyna búdjetten memlekettik járdemaqylar jáne asyraýshysynan aıyrylý boıynsha áleýmettik saqtandyrý memlekettik qorynan áleýmettik tólemder taǵaıyndalady, sondaı-aq jerleýge tólemder beriletin bolady. Jalpy tergeý nátıjeleri komısıa jumysynyń qorytyndysy boıynsha usynylatyn bolady.