Almaty-Atyraý baǵytyndaǵy №29/30 jolaýshylar poıyzynyń brıgada músheleri jolaýshyny bosandyryp alýǵa májbúr boldy.
Bul týraly «Qazaqstan temir joly» UK» AQ baspasóz qyzmeti málimdegen, dep habarlaıdy Almaty-akshamy.kz.
Oqıǵa 19 maýsymda bolǵan. Almaty-Atyraý baǵytyndaǵy №29/30 jolaýshylar poıyzynyń brıgada músheleri Noǵaıly stansasyna jetpeı shuǵyl túrde jolaýshyny bosandyryp alýǵa májbúr boldy.
Jolserikter tolǵaǵy kelgen áıelge kómektesý úshin barlyq qajetti sharalardy qoldandy, ol jaıly poıyz mashınısine habarlanyp, jaqyn mańdaǵy stansıaǵa jedel járdem shaqyryldy. Ul balanyń ómirge kelýine jolaýshylar da kómektesken.
«Biz Karına Balǵanym men Aqmamyq Bekenova esimdi jolaýshylarǵa alǵys aıtamyz. Poıyz brıgadasy men jolaýshylardyń úılesimdi jumysynyń arqasynda bala aman-esen dúnıege keldi», - deıdi vagonnyń jolserigi Maral Ádilbekova.
Saǵyz stansasyna jetken soń jańa týǵan náreste men anasy jedel járdem dárigerlerine tapsyryldy.