Elimizdiń birqatar óńirinde syqyrlaǵan sarshunaq aıaz bolyp, aqtútek boran soǵyp tur. Osyǵan baılanysty keıbir óńirlerde joldar jabyldy.
"Qaraǵandy-Astana" tas jolynyń boıynda jolda qalǵan Ózbekstan azamattary qutqaryldy. Saryaǵashtan elordaǵa qaraı shyqqan avtobýs Astanaǵa jetpeı synǵan. Kólikte bolǵan 20 shaqty jolaýshy qutqaryldy. Tártip saqshylary olardy Osakarov aýdanyna deıin jetkizip, jatyn oryn isher tamaqpen qamtamasyz etti.
"Jeksenbi kúni saǵat keshki segizde avtobýspen júrdik. Ózbekstan azamatymyz. Bizge ystyq tamaq berdi, jatyn orynǵa ornalastyrdy. Biz 25 adam edik, 8 adam Qaraǵandyda tústi. 17-miz osyndamyz", -deıdi Ózbekstan Respýblıkasynyń azamaty Ábýbákir Haıtov.
Qyzylordalyq polıseıler aýa-raıynyń qolaısyzdyǵyna baılanysty sońǵy bir táýlikte 15 júrgizýshige kómek kórsetti. Aýa raıy kúrt sýytyp, boran soǵyp jolda qalyp qoıǵan. Keıbiriniń jaǵarmaılary qatyp qalǵan. Aıta ketý kerek, "Qorqyt ata" áýejaıy da reısterdiń keshigýi múmkin ekendigin jolaýshylarǵa eskertti.
Túrkistan oblysynda qatty boran saldarynan jolda qalǵandar qutqaryldy. Aımaqta qazir aýy raıynyń kúrt sýytýyna baılanysty mektepterdiń basym kópshiligi qashyqtan bilim alýǵa kóshken. "Shymkent–Taraz" avtojoly jáne Túlkibas aýdanynda ishki joldar jabylǵan. Osy kúrejol boıynda qalǵan úsh birdeı toıota álfard kóliginiń júrgizýshileri men jolaýshylary qutqarylǵan. Al Báıdibek aýdanynda kesheden beri burqasyn jel turyp, aıaz boldy. Saldarynan Túrkistan oblysy Báıdibek pen Túlkibas aýdandarynyń aýmaǵy, Batys-Eýropa Batys-Qytaı trassasy men oǵan qosylatyn eldi mekender joldary jabyldy. Bul aýmaqtardan da birneshe jeńil kólik qar qursaýynan shyǵarylyp, aqtútekte adasyp ketken shopan da tabyldy.
Aqmola oblysynda qatty aıazda jolda qalǵan 31 adam Kókshetaý qalasyndaǵy jylytý pýnktine jetkizildi. Olardyń ekeýi bala. Barlyǵy Tájikstan Respýblıkasynyń azamattary. Aıta keteıik, Qazirgi tańda óńirde kún kúrt sýytty. Aýa temperatýrasy -37 gradýsqa deıin tómendedi.