2025 jyly Almatyda sıfrlyq jobalardy damytýǵa 16,3 mlrd teńge bóliný josparlanyp otyr.
2025–2027 jyldarǵa arnalǵan búdjet jobasy aldaǵy Máslıhat sesıasynda qaralady, dep habarlaıdy aqshamnews.kz
Bul týraly qalalyq Máslıhattyń baspasóz qyzmeti habarlady.
2025 jyly jańa búdjet aıasynda qarajat halyq kóp jınalatyn oryndar men «Sergek» aparattyq-baǵdarlamalyq keshenindegi 6 myń kamerany tehnıkalyq qyzmet kórsetýge baǵyttalady dep josparlanyp otyr. Bul keshenderdiń jumysy nátıjesinde megapolıste jol-kólik oqıǵalarynyń sany 17%-ǵa, al jol apatynan qaza tapqandar sany 40%-ǵa azaıǵan. Qazirgi ýaqytta qalada osyndaı 1 641 keshen jumys isteıdi. Bıylǵy jyldyń 9 aıynda Almatyda 3 mln-nan astam quqyqbuzýshylyq tirkelgen, onyń ishinde 18,7 mlrd teńgeden astam aıyppul búdjetke óndirildi.
Sonymen qatar, megapolıste «Biryńǵaı beınemonıtorıng júıesi» jobasyn iske asyrý jalǵasýda. Qazirgi tańda júıege 45,2 myń beınekamera qosylǵan, olardyń ishinde 616 memlekettik jáne 240 jeke nysan bar. Kelesi jyly olardyń sany 70 myńǵa deıin artady. Jobanyń negizgi maqsaty – qalanyń barlyq beınebaqylaý kamerasyn biriktirý úshin biryńǵaı platformany engizý. Bul beıneaǵyndardy naqty ýaqyt rejıminde taldaýǵa jáne olardy túrli mindetter úshin paıdalanýǵa múmkindik beredi. Jasandy ıntellekt algorıtmderi adamdardyń toptalýyn anyqtaýǵa, olardyń minez-qulqyn taldaýǵa, tóbeles, kúdikti zattar, adamdar men kólikterdi izdeýge, sondaı-aq órt pen tútindi tanýǵa múmkindik beredi.
Kelesi jyly komýnaldyq qyzmetter men qalalyq servısterdiń máselesin sheshýge baǵyttalǵan jańa beıneanalıtıka túrlerin iske qosý josparlanǵan. Olar qoqys tastalǵan aımaqtardy anyqtaý, qoqys konteınerleriniń tolý deńgeıin baqylaý, qoǵamdyq oryndar men kóshelerdegi sý basý deńgeıin baǵalaý, buralqy janýarlardy anyqtaý jáne taǵy basqa máseleni qamtıdy.
Aıta keteıik, «Azamattar kóp jınalatyn oryndarda beınemonıtorıng júıesi» jobasy aıasynda bıylǵy jyldyń sońyna deıin 6 myń kamera ornatylady.
Buǵan qosa, búdjetten bólingen qarajattyń bir bóligi qalanyń barlyq qyzmet belsendiligin onlaın rejımde baqylaýǵa múmkindik beretin Qalalyq ahýaldyq ortalyqty odan ári damytýǵa jumsalmaq.