Almaty qalasy boıynsha QAJ departamentiniń №11 mekemesinde “Shekteýsiz oqý” jobasy aıasynda jazasyn óteýshi jasóspirimder arasynda “Kitap oqýǵa qushtarlyq” baıqaýy ótti.
Oǵan Almaty qalasynyń Jambyl atyndaǵy qalalyq jasópirimder kitaphanasynyń oqyrmandarǵa qyzmet kórsetý bóliminiń meńgerýshisi Nurlyhan Jumahan jáne Sharaına Qumarova qazylyq etti. Sonymen qatar, mekemedegi jalpy bilim beretin mekteptiń ókilderi, til mamandary A.Alıeva men E.Býtenko qatysty.
Baıqaýǵa qatysqan on tórt jazaly jasópirim ózderi oqyǵan ár shyǵarmanyń mazmunyn, berer tárbıesin, jastarǵa úlgi bolar tusyn naqtylap jetkize bildi. Sondaı-aq, olardyń jyrdy mánerlep, naqyshyna keltirip oryndaýynan, qara sózdi berile áserli áńgimeleýinen kitapty qyzyǵa oqyǵandaryn, sol arqyly kóńilderine medeý, jandaryna saıa tapqandary sezildi.
İs-shara barysynda Abaıdyń, Beıimbet Maılıniń, Berdibek Soqpaqbaevtyń jáne Asqar Súleımenovtiń, detektıv sheberi Agata Krıstıdiń, orystyń ataqty jazýshylarynyń shyǵarmalarymen qosa, qazirgi zaman ádebıeti ókilderiniń shyǵarmalary da tilge tıek boldy.
Ýaqytyn bosqa ótkizbeı, kórkem týyndy oqýǵa bet burǵan jetkinshekterdiń eńbegi elenip, syı-syıapat jáne mekeme bastyǵy atynan maqtaý qaǵazdar tabys etildi.
— Jasóspirimderdiń kitap oqýǵa degen qushtarlyǵy qýantady bizdi. Kitap ta tárbıe quraly. Aıaǵyn jaza basyp, sotty bolǵan jastar ondaǵy keıipkerlerdiń ómirinen, sózinen úlgi alyp, jaqsylyqqa umtylsa, oı túıe bilse, biz úshin úlken jetistik sol, — deıdi mekeme bastyǵy ádilet polkovnıgi Almat Súleımenov.