Qazirgi ýaqytta aýyl mektepterindegi pedagog mamandar 400 myń teńgege jýyq jalaqy alyp otyr.
Bul týraly QR Oqý-aǵartý vıse mınıstri Ǵanı Beısembaev aıtty, dep habarlaıdy Almaty-akshamy.kz.
«Qazirgi kezde pedagogterdiń jalaqysyn kóterý maqsatyndaǵy is-sharalar 2020 jyldyń qańtar aıynan bastaldy. Bul baǵyttaǵy jumystar 2023 jyly aıaqtalady. Sonymen qatar attestasıadan jáne biliktilikti arttyrýdan ótken bizdiń ustazdar úshin qosymsha tólemder eskerilgen. Osy qosymsha tólemder men ústemeaqyny, jalaqyny ósirýdi eskere otyryp, aýyl mektebindegi pedagog ortasha eseppen 400 myń teńgege tarta alyp otyr», - dedi Ǵ.Beısembaev «Habar 24» arnasyna bergen suhbatynda.
Onyń aıtýynsha, 2021 jyldan beri 26 pedagog alǵash ret «Qazaqstannyń eńbek sińirgen ustazy» ataǵyn aldy.
«Qazaqstannyń eńbek sińirgen ustazy» memlekettik nagradasy muǵalimderge úzdik jetistikteri men memleket aldyndaǵy erekshe eńbegi úshin beriledi. Joǵary ataqqa ıe bolǵan pedagog 1 000 AEK (shamamen 3 mln teńge) mólsherinde birjolǵy tólem alady.
«Munymen qosa, memleket úzdik muǵalimderge qoldaý kórsetip keledi. Úzdik muǵalim ataǵyn alǵan pedagogter 1 myń AEK mólsherinde syıaqy alady. Osy oraıda memleket jasap otyrǵan qolaıly jaǵdaıdyń arqasynda bilimdi oqýshylar sany artanynyna senimimiz mol», - dedi vıse-mınıstr óz sózinde.