Bılet alýǵa aqsha tappaǵan adam endi bul áreketi úshin aıyppul tóleıdi.
Almatyda bıletsiz er adam dittegen jerine poıyz vagonynyń shatyrynda jatyp jetip almaq bolǵan.
Vıdeo áleýmettik jelide tarady. Onda ornynan qozǵalyp bara jatqan poıyz vagonynyń biriniń ústinde er adam jatqanyn kórýge bolady, dep habarlaıdy Almaty-akshamy.kz QazAqparatqa silteme jasap.
Kóliktegi polısıa departamentiniń baspasóz qyzmetinen málim etkendeı, oqıǵa 24 shilde kúni saǵat 22:45-te bolǵan.
«Almaty-1» stansıasyndaǵy kezekshi bólimshege «Almaty-2» stansıasynan «Almaty-Oral» poıyzynyń mashınısinen vagonnyń tóbesine shyǵyp, jatyp alǵan er adamnyń kesirinen poıyz shuǵyl toqtatylǵany týraly habarlama tústi.
«Poıyz toqtaǵannan keıin kólik polıseıleri quqyq buzýshyny akt boıynsha vagonnyń tóbesinen túsirdi. Tekserý barysynda onyń Batys Qazaqstan oblysynyń 47 jastaǵy turǵyny ekeni anyqtaldy. Jaýap alý barysynda er adam bılet alýǵa aqshasy joǵyn aıtyp, poıyzdyń tóbesinde úıine jetýdi uıǵarǵan», - dep habarlady Kóliktegi polısıa departamentiniń baspasóz qyzmetinen.
Atalǵan azamatqa qatysty QR ÁQBtK-niń 560-baby boıynsha 5 AEK kóleminde aıyppul salyndy.