Almatynyń Almaly aýdanynda bıyl Jibek Joly dańǵylynyń jaıaý júrginshiler aımaǵy (Nazarbaev dańǵylynan Seıfýllın dańǵylyna deıin) «qasbetten qasbetke deıin» qaǵıdaty boıynsha jóndeýden ótedi. Sondaı-aq, Músirepov atyndaǵy balalar men jasóspirimder teatry janyndaǵy skver qaıta jańartylady. Bul týraly qala ákimi Erbolat Dosaev aýdan turǵyndarymen kezdesý barysynda málimdedi, dep habarlaıdy aqshamnews.kz
Almaly aýdany – sońǵy úsh jylda aýqymdy kórkeıtý jumystary júrgizilgen qalanyń tarıhı ortalyǵy.
Mańyzdy jobalardyń biri – qala turǵyndarynyń súıikti demalys orny sanalatyn M.Mámetova men Á.Moldaǵulova atyndaǵy skverdi qaıta jańartý. 2024 jyldyń jeltoqsanynda negizgi qurylys-montaj jumystary aıaqtaldy. Kógaldandyrý men gúlzarlardy otyrǵyzý 2025 jyldyń kóktemine josparlanǵan.
Qalany kórkeıtýge baǵyttalǵan taǵy bir iri joba – Saıran kólin kóriktendirý. Byltyr jeltoqsanynda avtosýarý jáne sýmen jabdyqtaý júıesin júrgizý, elektrmen jabdyqtaý jáne jaryqtandyrý kabelderin tartý, sondaı-aq aǵashtardy sanıtarlyq maqsatta kesý jumystary aıaqtaldy.
Bıyl sáýir-mamyr aılarynda, kún jylynǵan soń kespe tas tóseý, shaǵyn sáýlet nysandaryn ornatý jáne 200-den astam iri jóke aǵashy men basqa da jasyl jelek otyrǵyzý josparlanyp otyr.
Aıta ketý kerek, Almaly aýdanyndaǵy eń kóp baratyn jaıaý júrginshiler kóshesi – Panfılov kóshesi (kúnine 10-15 myń adam) 2017 jyldan beri jóndeý kórmegen. 2024 jyldyń qarashasynda Qabanbaı batyr kóshesinen Jibek Joly dańǵylyna deıingi bólikti kórkeıtý jobasy aıaqtaldy. Joba aıasynda jol boıy men shaǵyn sáýlettik nysandar jańartylyp, jasyl aımaq 20%-ǵa ulǵaıtylyp, kópjyldyq butalar otyrǵyzyldy.
Buǵan qosa, osy aıda Jibek Joly dańǵylynyń jaıaý júrginshiler aımaǵyn (Nazarbaev dańǵylynan Seıfýllın dańǵylyna deıin) «qasbetten qasbetke deıin» qaǵıdaty boıynsha kúrdeli jóndeýge jáne Músirepov atyndaǵy balalar men jasóspirimder teatry janyndaǵy skverdi qaıta qurýǵa JSQ ázirleý bastalady.
Bul jumystar 2025 jyldyń qarasha aıynda aıaqtalady dep josparlanǵan.