Qazirgi ýaqytta tergeý amaldary júrgizilip jatyr.
Almaty oblysynyń polıseıleri kúzetshige shabýyl jasap, tonaǵan azamatty ustaǵan, dep habarlaıdy Almaty-akshamy.kz.
İshki ister mınıstrligi resmı saıtynyń deregi boıynsha, kezekshilik kezinde qurylys kompanıasynyń kúzetshisine shabýyl jasalǵan. Polısıaǵa shaqyrý Taldyqorǵan qalasyndaǵy aýrýhanadan kelip tústi, onda dene jaraqattaryn alǵan er adam jetkizilgen.
Aýrýhanaǵa kelgen tártip saqshylary 67 jastaǵy jergilikti turǵynnan aryz qabyldady. Onyń aıtýynsha, beıtanys er adam kúzet kúrkesinde ony uryp-soǵyp, uıaly telefonyn, kıimderin, aqshasy bar ámıanyn alyp ketken. Jalpy shyǵyn somasy 97 500 teńgeni qurady.
«Oqıǵa ornyna jedel tergeý toby dereý shyqty. Odan ári oqıǵa ornynda 33 jastaǵy kúdikti azamat ustaldy. Ol buryn ártúrli baptar boıynsha jaýapqa tartylǵan SHQO týmasy bolyp shyqty. Qazirgi ýaqytta tergeý amaldary júrgizilýde», – dedi Taldyqorǵan qalalyq polısıa basqarmasynyń Shyǵys polısıa bólimi bastyǵynyń mindetin atqarýshy Baqytjan Tólegen.
Mamandardyń aıtýynsha, ustalǵan azamat kinásin moıyndaǵan. Qazir ol qamaýda otyr.