Olar aýyl turǵyndaryna ortaq máselelerdi talqylady.
Almaty oblysy ákiminiń orynbasarlary men osy óńirdegi túrli sala basshylary birqatar aýyl turǵyndarymen kezdesip, olardyń muń-muqtajyn tyńdady, dep habarlaıdy Almaty-akshamy.kz.
«Kerbulaq aýdany turǵyndarynyń el Prezıdenti Qasym-Jomart Toqaevtyń atyna jazǵan aryzyna baılanysty oblys ákimi Qanat Bozymbaev arnaıy komısıa qurdy. Oblys ákiminiń birinshi orynbasary Lazzat Turlashov jetekshilik etken, quramynda barlyq salalyq basqarmalardyń basshylary bar komısıa eki kún qatarynan Kúreńbel óńirin aralady. Turǵyndarmen kezdesý barysynda ózekti máselelerin aýyldyqtardyń óz aýzynan estip, túıtkilderdiń sheshimin halyqpen birge talqylady», - delingen Almaty oblysy ákiminiń baspasóz qyzmetiniń habarlamasynda.
Saryózek, Qaspan, Basshı, Qosaǵash, Onjas, Bostan, Shaǵan aýyldaryna at basyn burǵan komısıaǵa turǵyndar negizinen jer, aýyz sý sapasy, jol jóndeý, mal urlyǵyn tyıý, turǵyn úı-kommýnaldyq sharýashylyq, ırrıgasıa, ekologıa t.b máseleler jaıyn jetkizdi.
Barlyq aýyldarda derlik kóterilgen ortaq másele – mal jaıatyn jaıylymnyń, mal azyǵyna qajetti shabyndyqtyń, egistik jerlerdiń jetispeýshiligi. Olardyń aıtýynsha, aýyl mańyndaǵy jerlerdiń barlyǵy ınvestısıalyq joba aıasynda iri kásipkerlerge berilgen, al jergilikti turǵyndarǵa jer jetispeıdi.
Bul máseleniń sheshimi jaıly oblystyq jer qatynastary basqarmasynyń basshysy Sábıt Sádýaqasov naqty túsindirip berdi. Ol 2020 jyly Jer kodeksine jergilikti turǵyndardyń suranysyn qanaǵattandyrý maqsatynda memleket muqtajdyǵy úshin jerlerdi qaıtaryp alýǵa qatysty ózgerister engizilgenin aıtty. Soǵan sáıkes, okrýg ákimderi mal jaıylymyna qajetti jerlerdi aıqyndap berýge múmkindikteri bar.
Sonymen qatar aýdandaǵy bos jerlerge ýaqytsha jer paıdalaný quqyǵyn berý jónindegi konkýrs ótkizý kezinde eldi meken mańyndaǵy jer ýchaskelerin aýdan ákimdigi aýqymdy kólemde emes, jergilikti turǵyndardyń ıgerý múmkindikterine laıyqtap, shaǵyn 2-5 gektardan lotqa bólip shyǵarý kerektigin jetkizdi. Sonda shaǵyn jer alqabyna syrttan eshkim kelýge múddeli bolmaıdy jáne jer ýchaskelerine turǵylyqty halyqtyń ıe bolýyna jol ashylady. Mundaı oń tájirıbe Aqsý aýdany Qyzylaǵash aýylynda buǵan deıin bolǵan.
Ekinshiden, aýqymdy jer ýchaskelerin jalǵa alyp otyrǵan ınvestorlardyń bıznes-josparlarynda kórsetilgen kásiporyn ashý, jergilikti halyqqa jumys berý sıaqty áleýmettik-ekonomıkalyq mindettemeleriniń qandaı deńgeıde oryndalǵanyna revızıa júrgiziledi. Jer ýchaskesi paıdalanylmaı otyrǵan jaǵdaıda memleketke qaıtarylyp alynady.
Jalpy, Kerbulaq aýdanynda bıyl 4357 ga jer konkýrsqa shyǵarylady dep josparlanyp otyr, sonyń 855 gektary – shabyndyq.
Jıi kóterilgen máseleniń endi biri – aýyz sýmen qamtý jáne sýdyń sapasy. Bul túıtkilderdi Qaspan, Basshı, Shaǵan, Qosaǵash, Qaınarly, Bostan, Saryózek, Onjas aýyldarynyń turǵyndary jetkizdi. Máselen, Onjas aýylyna 235 mln. teńgege aýylǵa aýyz sý tartylǵan.
«Biraq bul qubyr mekteptiń sýy úshin qazylǵan uńǵyma arqyly qosylǵan. Qazir rezervýarǵa sý tolmaıdy, mektepte sý bolsa, aýylda joq, aýylda sý bolsa, mektepke jetpeıdi», - deıdi turǵyndar.
Oǵan qosa qubyr da ár jerinen jarylyp jatqanǵa uqsaıdy. Degenmen ázirge merdigerdiń kepildi merzimi bite qoımaǵan. Bul máselege qatysty L.Turlashov aýylǵa arnaıy mamandar jiberip, olarǵa tıisti zerdeleý jasap, qorytyndy ázirletýdi tapsyrdy. Avtorlyq qadaǵalaý men tehnıkalyq qadaǵalaý mekemeleri, merdiger uıym, qoǵam belsendileri birlesip joba men jasalǵan jumysty taǵy bir salystyryp kórýi kerek. Merdigerdiń kemshilikteri anyqtalsa, ony kepildi merziminde joıýy tıis. Osy rette Lazzat Turlashov eldi mekenderde jasalatyn jobalardyń barlyǵyn kópshilikke tanystyryp, aqyldasyp, kemshiligi bolsa birlesip túzep, qoǵam belsendilerin ortaq iske tartyp otyrýdy tapsyrdy.
Basshı aýylyndaǵy sý qoımasynyń qurylysyn sapaly júrgizý, aýdan ortalyǵyndaǵy tozyǵy jetken úılerdi renovasıa arqyly jańǵyrtý, shetki kóshelerdi jaryqtandyrý, Shaǵan aýylyn negizgi kúrejolǵa qosatyn 6 shaqyrymdyq joldy jóndeý, Qosaǵash aýylyndaǵy eski mektep ǵımaratynyń bir bóligin ambýlatorıaǵa, ekinshi jaǵyn jas mamandarǵa turǵyn úı jasap berý, basqa da kóptegen áleýmettik máseleler talqylandy.
Eki kúndik sapar boıynsha qorytyndy jıyn ótkizgen oblys ákiminiń birinshi orynbasary Lazzat Turlashov aýdan basshylaryna ár turǵynnyń jan aıqaıy, aryz-shaǵymyna qatysty qabyldanýy tıis is-sharalar boıynsha naqty tapsyrmalar berdi. Sol sıaqty kóterilgen máselelerdiń barlyǵy qamtylǵan arnaıy jumys jospary ázirlenýi tıis. Eń bastysy, halyqpen, el ishindegi qoǵam belsendilerimen qoıan-qoltyq jumys isteý kerektigi qatań eskertildi.
«Syn-eskertpe kóp, talap joǵary ekenin kórip otyrsyzdar. Osy eki kúnde qanshama qordalanǵan problemalar aıtyldy. El ortaq, aýyl ortaq, másele ortaq, sondyqtan elmen keńesip, pikirin tyńdap, birlesip jumys isteńizder. «Halyq únine qulaq asatyn memleket» prınsıpiniń talaby da osy! Jergilikti jerdegi jumys ilgeriledi me, joq pa, sony kórýge birshama ýaqyttan keıin qaıta kelemin. Aýyl-aýyldarda turǵyndardyń jazǵan aryz-shaǵymdaryn, kózimmen kórgen jaǵdaılardy, estigen problemalardy oblys ákimine tolyq jetkizemin. Osy kóterilgen máselelerdiń barlyǵyna da qatysty tıisti sheshimder qabyldanady», - dedi Lazzat Turlashov.
