Jetisý oblysynyń prokýratýrasy 9 balalar lageriniń qyzmetine tekserý júrgizip, mekemelerdiń jaǵdaıy zań talaptaryna sáıkes kelmeıtinin anyqtady, dep habarlaıdy Almaty-akshamy.kz.
Atap aıtqanda, «Qarlyǵash» lagerinde (Kóksý aýdany) balalarǵa arnalǵan azyq-túlik sanıtarlyq-epıdemıologıalyq normalar saqtalmastan veterınarıalyq-sanıtarlyq saraptama men qaýipsizdik sertıfıkattarynsyz satyp alynǵan.
Balalarǵa arnalǵan kúndelikti tamaqtaný normalary saqtalmaǵan. As mázirinde jańa pisken kókónisterden jasalǵan taǵamdar qarastyrylmaǵan.
«Lagerlerdiń barlyǵynda derlik órt qaýipsizdigi normalary saqtalmaıdy. Alǵashqy órt sóndirý quraldary – órt sóndirgishter men órt gıdranttary joq, órt kezinde evakýasıalyq joldardyń kedergisiz shyǵýy qamtamasyz etilmegen. Keıbir lagerlerde merzimi ótken dári-dármekter saqtalǵan. Balalardyń lagerlerde turýy men bos ýaqytyn ótkizý jaǵdaıy da tehnıkalyq normalar men qaýipsizdik talaptaryna sáıkes kelmeıdi. Negizgi (ǵımarattar, úıler) jáne qosalqy (as úı, jýynatyn bólmeler jáne t.b.) lager ǵımarattary tozǵan, kúrdeli jóndeýdi qajet etedi», - delingen prokýratýra habarlamasynda.
Al «Shaǵala» lagerinde (Alakól aýdany) oıyn-saýyq keshenderi múlde bolmaǵan.
Sonymen qatar Tekeli qalasyndaǵy lagerlerdiń birinde «Paranoıdty shızofrenıa» dıagnozymen esepte turǵan medısına qyzmetkeri anyqtaldy.
«Tekserý is-sharalary jalǵasyp jatyr. Barlyq anyqtalǵan buzýshylyqtar boıynsha prokýrorlyq qadaǵalaý sharalary qabyldanatyn bolady», - dedi prokýratýradan.