Reıd barysynda mal urlyǵy faktileriniń aldyn alý jumystary da júrgizilip jatyr
Jetisý oblysynda shalǵaıdaǵy sharýa qojalyqtaryn tekserý bastaldy, dep habarlaıdy Almaty-akshamy.kz Polisia.kz-ke silteme jasap.
Jetisý polısıa qyzmetkerleri sońǵy on kúndikte shalǵaıdaǵy fazendalar men fermerlik sharýashylyqtarda zańsyz saqtalǵan 14 atys qarýyn tárkiledi jáne elde bolý erejelerin buzǵan 16 shetel azamattaryn anyqtady. Resmı málimetterge sáıkes, oblys aýmaǵynda mal sharýashylyǵymen aınalysatyn 2300-ge jýyq sharýa qojalyqtary jumys isteıdi. Olardyń bir bóligi eldi mekenderden alys jerde, taýly jáne dala aımaǵynda ornalasqan.
– Sharýa qojalyqtaryn aralap shyǵý jáne tekserý jumystaryn arnaıy top júrgizýde, onyń quramynda ýchaskelik ınspektorlar, kóshi-qon qyzmeti jáne basqa da polısıa bólimsheleriniń qyzmetkerleri bar. Alǵashqy on kúnde 1195 sharýashylyq tekserildi. Onda tirkelmegen 11 tegis uńǵyly myltyq, 2 ıir oıyqty vıntovka, 1 gaz tapanshasy tabyldy jáne tárkilendi. Sondaı-aq, sharýa qojalyqtaryndaǵy jumyskerlerdiń arasynda kóshi-qon zańnamasynyń talaptaryn elemeı júrgen shetel azamattary anyqtaldy, – dedi oblys PD JPQ bastyǵy Qaısar Muhmetov.
Reıd barysynda mal urlyǵy faktileriniń aldyn alý jumystary da júrgizilip jatyr. Polısıa qyzmetkerleri oblystaǵy barlyq sharýa qojalyqtaryn, sonyń ishinde malshylardyń tirkelmegen qystaýlary jáne qaraýsyz qalǵan qoı qoralaryn aralap ótýdi josparlap otyr.