Bıyl birneshe ýnıversıtette restavrator mamandyǵy ashylmaq
Elimizde Restavrasıa jáne konservasıa ortalyǵy ashyldy, dep habarlaıdy Almaty-akshamy.kz Almaty.tv-ge silteme jasap.
Almatydaǵy «Ǵylym ordasynda» qurylǵan ortalyq restavrasıa salasyna qajetti eń zamanaýı 65 birlik kásibı qural-jabdyqpen qamtylǵan. Munda hımıalyq zerthana, túpteý, ǵylymı-zertteý, karantın jáne foto bólimderi bar. Ashylý saltanatyna arnaıy qatysqan Ǵylym jáne joǵary bilim mınıstri ortalyqtyń múmkindigimen tanysty. Mınıstrlik byltyr osy ortalyqty qurýǵa 500 mln teńge bólgen. Maqsat – jınaqtalǵan eski derekter men qoljazbalardy saqtaý, zertteý.
«Bizdiń kóne túrik tilinen bastap, shaǵataı, qypshaq tilinde derek óte kóp. Olardyń kóbi búlingenine baılanysty ǵylymı aınalymǵa enbeı jatyr. Negizgi maqsatymyz – bárin qalypqa keltirip, sandyq formatqa kóshirý», – dedi «Ǵylym ordasy» RMK bas dırektorynyń orynbasary Nurlan Seıdin.
Ortalyqta eski kitap pen gazet-jýrnaldar, arhıvtik qujattar retke keltiriledi. Zamanaýı jabdyqtardyń kómegimen mamandar shań basyp, tozǵan qaǵazdarǵa dezınfeksıa jumysyn jasap, materıaldar men sıa erekshelikterine qaraı zertteý júrgize alady. Zerthana jumysqa saqadaı saı bolǵanymen sharýany dóńgeletetin bilikti kadr tapshy. Elimizdegi bir de bir oqý orny restavrator mamandyǵyn oqytpaıdy eken. Sondyqtan qazir mınıstrlik Reseıden restavrator mamandar aldyryp, kadr oqytýdy bastap ketipti. Olqylyqty túbegeıli sheshý úshin bıyl birneshe ýnıversıtette restavrator mamandyǵy ashylmaq.
«Qazirgi tańda bakalavrıatqa tolyq oqytýǵa ádistemelik kúshimiz jetpeıdi. Magıstratýra deńgeıinde «murajaı isi», «arhıvarıýs» sıaqty mamandyqtardy sál oqytyp, restavrasıaǵa baǵyttaýǵa múmkindigimiz jetedi. «Bolashaq» baǵdarlamasynyń aıasynda jáne 500 ǵylymı-taǵylymdamanyń aıasynda osy jyldan bastap ǵylymı-restavrasıalyq ortalyqtarǵa óz mamanymyzdy jiberýdi bastaımyz», – dedi QR Ǵylym jáne joǵary bilim mınıstri Saıasat Nurbek.