Jol apaty «Aqtaban» degen aýyldyń mańaıynda bolǵan.
«Taldyqorǵan – Lepsi» tas jolynda jedel járdem kóligi men jol jıeginde turǵan «Ýral» júk kóligi soqtyǵysyp, kesirinen eki adam qaza boldy, dep habarlaıdy Almaty-akshamy.kz
Jedel járdem kóliginde júrgizýshi men feldsher bolǵan. Olar qatty soqqydan dalaǵa ushyp ketken. Medısına qyzmetkerleri kelgenshe deıin tiri bolǵan, ókinishke qaraı, keıin kóz jumǵan.
Jol apatyna kýá bolǵandar eki adam da sóılep jatqanyn aıtady.
«Júrgizýshi qyryldap bizge nazar aýdarmady. Al feldsher óziniń atyn aıtyp, bizben sóılesti. Ol ómirmen sońyna deıin kúresti. Er azamattardyń qaza tapqany óte ókinishti», - dedi kýáger.
Júk kóliginiń júrgizýshisi joldyń jıegine kóligin jóndeý úshin qoıǵan. Arnaıy belgi turǵanymen, jaryǵy sónip turǵan. Jedel járdem kóliginiń tas-talqany shyqqan.
Polısıa jol apatyna jedel járdem kóligi kináli ekenin aıtty
«Aqsý aýdanynda jergilikti mańyzy bar Kóltaban - Mataı avtojolynda jedel járdem kóligi men Ýral júk kóliginiń qatysýymen adam ólimine ákep soqqan jol apaty boldy. Jol-kólik oqıǵasyna jedel járdem kóliginiń 57 jastaǵy júrgizýshisi kináli ekeni anyqtaldy, ol róldi basqara almaı, jol boıynda turǵan júk kóligine soqtyǵysqan. JKO saldarynan jedel járdem kóliginiń júrgizýshisi men 54 jastaǵy jergilikti feldsher oqıǵa ornynda kóz jumdy. Fakti boıynsha qajetti saraptamalardy taǵaıyndaýmen sotqa deıingi tergeý bastaldy», - dep habarlady polısıa departamenti.