Qyzyl jalyn úıdiń 100 sharshy metr aýmaǵyn sharpydy
Jetisý oblysynda gaz balony jarylyp, 4 adam zardap shekti. Onyń ekeýiniń jaǵdaıy aýyr, jansaqtaý bóliminde jatyr, dep habarlaıdy Almaty-akshamy.kz.
66 jáne 42 jastaǵy áıelderdiń denesiniń 40-50 paıyzyn kúıik shalǵan. Al taǵy 61 jastaǵy er adam men 3 jastaǵy balanyń jaǵdaıy ortasha aýyr. Olardyń qol-aıaqtary kúıgen.
«20 qańtarda saǵat 13:36-da Jetisý oblysy Qaratal aýdany Úshtóbe qalasyndaǵy jeke turǵy úıdiń birinde kólemi 5 l gaz balony jaryldy. Saldarynan qyzyl jalyn úıdiń 100 sharshy metr aýmaǵyn sharpydy. Zardap shekken tórt adam, onyń ishinde bir bala aýrýhanaǵa jatqyzyldy. Jetisý oblysy TJD bes qyzmetkeri jáne eki tehnıkasynyń kúshimen órt saǵat 14.15-te sóndirildi»,- delingen Jetisý oblystyq Tótenshe jaǵdaılar departamentiniń baspasóz qyzmetiniń habarlamasynda.
Jarylystyń aldyn-ala sebebi - qatty otynmen jylytylatyn peshtiń janyna 5 lıtrlik gaz balonyn jylytýǵa qoıǵan.
«TJD azamattardy órt qaýipsizdigi erejelerin saqtaýǵa jáne gaz balondardy jylytý peshteriniń janynda jáne basqa da jyldam qyzdyrý tásilderi arqyly jylytpaýǵa shaqyrady», - delingen habarlamada.