Aýyl sharýashylyǵy men kásipkerlik te oblys búdjetinen qoldaý tapty.
Almaty oblysynda qarjynyń basym bóligi bilim berý men densaýlyq saqtaý jáne áleýmettik qoldaý sharalaryna jumsalady. Bul týraly qarjylyq qujatqa engizilgen ózgerister men tolyqtyrýlar barysynda aıtyldy, dep habarlaıdy Almaty-akshamy.kz.
«2021-2023 jyldarǵa arnalǵan oblys búdjetiniń qaı salalarǵa baǵyttalatyny jańa ózgerister men tolyqtyrýlar negizinde bekitildi. Qarjynyń basym bóligi bilim berý men densaýlyq saqtaý jáne áleýmettik qoldaý sharalaryna jumsalady. Sol sıaqty turǵyn úı-kommýnaldyq sharýashylyq, qurylys, mádenıet pen sport salalary da nazardan tys qalǵan joq. Aýyl sharýashylyǵy men kásipkerlik te oblys búdjetinen qoldaý tapty»,– delingen Almaty oblysy ákimdiginiń baspasóz qyzmetiniń habarlamasynda.
Oblystyq ekonomıka jáne búdjettik josparlaý basqarmasynyń basshysy Jomart Ámirhanovtyń aıtýynsha, Almaty oblysynyń búdjetine jalpy somasy 55 mlrd. teńge bolatyn maqsatty transfertter qosymsha bólingen. Búdjettiń negizgi shyǵyndary eń aldymen áleýmettik salalarǵa, sol sıaqty Nur Otan partıasynyń 2021-2025 jyldarǵa arnalǵan baǵdarlamasyndaǵy mindetterdi júzege asyrýǵa baǵyttalady.
Bul rette, máselen, Eskeldi, Qaratal, Kóksý, Qarasaı jáne Sarqan aýdandarynda jańa mektepterdiń qurylysy bastalady. Qurylys jumystaryn bastaýǵa 600 mln. teńgeden astam qarjy bólingen. «Jumyspen qamtý jol kartasy» sheńberinde oblystyń aýdandary men Taldyqorǵan qalasynda taǵy 7 mekteptiń qurylysyna, sol sıaqty Alakól aýdanyndaǵy lagerdi qaıta jańǵyrtýǵa Ulttyq qordan 7,6 mlrd teńge baǵyttalady. Sonymen birge balalardyń qaýipsizdigin qamtamasyz etý maqsatynda mektepterge dabyl tetikteri, týrnıketter ornatyp, arnaıy kúzet qoıýǵa da qarjy qarastyrylǵan.