Dinı basqarma vaksına naýqanyn qoldap, osy taqyrypta meshitterde túsindirme jumystaryn ótkizedi.
Almaty qalasy Jetisý aýdany «Álı Muhammed» meshitiniń bas ımamy Qanatáli Taqyrov Qurban aıttyń mán-maǵynasyn túsindirip, karantın kezindegi merekeniń formaty týraly aıtty, dep habarlaıdy Almaty-akshamy.kz.
Eske salsaq, Almatyda koronavırýs ınfeksıasynyń órshýine baılanysty Qurban aıt merekesine arnalǵan barlyq is-shara onlaın-formatta ótedi. Jetisý aýdany «Álı Muhammed» meshitiniń bas ımamy Qanatáli Taqyrov óz suhbatynda indetke baılanysty dindarlarǵa qaýipsizdik sharalaryn saqtaý týraly eskertti. Dinniń jeke adamnyń, búkil qoǵamnyń densaýlyǵyn saqtaýdy talap etetinin aıtty. Sondaı-aq búkil álem musylmandary engizilgen shekteýlerge túsinistikpen qaraýda.
Qanatáli Taqyrov Qurban Aıt merekesi týraly jan-jaqty aıtyp berdi.
«Islamda qasıetti eki mereke bar. Biri - biz kútken Qurban aıt pen Ramazan aıynda ótetin Oraza aıt. Qasıetti Qurban aıt merekesi Ibrahım paıǵambar (s.ǵ.s) kezinen bastaý alady. Ol ulyn qurbandyqqa shalýǵa kelisip, Allaǵa moıynsundy. Alaıda Alla taǵala jerge qurbandyqqa shalynǵan qoshqardy jiberdi. Biz bul súnnetti ári ıgi joldy qaıtalaımyz», – dedi ımam.
«Qurban» sózi «jaqyndaý», «jaqyn bolý» degendi bildiredi. Dinı termın retinde bul belgili bir ýaqytta Qudaıǵa qulshylyq etý nıetimen janýardy qurbandyqqa shalýdy aıtady. Qurban aıt merekesi Zýlhıjja aıynyń alǵashqy 10 kúninde toılanady. Qazaqstan musylmandary Dinı basqarmasynyń ıslam merekeleriniń resmı kúntizbesine sáıkes, Qurban aıt merekesi bıyl 20, 21 jáne 22 shildege keledi.
Qanatáli Taqyrovtyń aıtýynsha, Hanafı mazhabyna sáıkes, qurbandyq shalý – ýájip, ıaǵnı mindetti.
«Paıǵambarymyz Muhammed (s.ǵ.s) bylaı dedi: «Kimde-kim bir tamshy qanmen qurbandyq shalsa, barlyq kúnálary keshiriledi. Al qurbandyqqa shalynǵan mal oǵan qıamet kúni kómektesedi», – dedi Jetisý aýdany meshitiniń bas ımamy.
Mereke týraly aıta kele, Qanatáli Taqyrov bıyl indetke baılanysty aıt namazy, sondaı-aq Almaty meshitterinde qurbandyq shalýdyń toqtatylǵanyn habarlady.
«Osy sebepterge baılanysty Qazaqstan musylmandary Dinı basqarmasy www.qurban2021.kz saıtyn iske qosty. Onyń kómegimen dindarlar kómekke muqtaj otbasylarǵa maldy qashyqtan sadaqa retinde bere alady. Ótinimder 22 shilde kúni saǵat 14.00-ge deıin qabyldanady», – dedi Qanatáli Taqyrov.
Ótken jyly karantın kezinde 1100-den astam usaq mal men 50 iri qara qurbandyqqa shalyndy. Qazirdiń ózinde ótinimder shamamen birdeı kólemde kelip túsýde. Sońǵy derekter keıinirek shyǵarylady.
Qurbandyq eti muqtaj otbasylarǵa taratylady ári balalar men qarttar úıi sıaqty memlekettik mekemelerge jiberiledi. Ótken jyly qurbandyqqa shalynǵan maldyń etin 5 500-ge jýyq adam aldy.
«Álı Muhammed» meshitiniń bas ımamy dindarlardy qashyqtyq formatynda qurbandyq shalýdy alańdamaýy kerek dedi. Dinge sáıkes bul qolaıly.
«Shynynda kópshilik adamda kúmán bar. Biraq onysy negizsiz. Qurban aıt kezinde ekinshi adamǵa qurbandyq shalý qarastyrylǵan, bul sharıǵatta bar. Mysaly, eger adam alys qalada nemese issaparda bolsa. Sondaı-aq sol jerde qurbandyq shalý múmkin bolmasa, onda ol senimdi adamǵa Almaty qalasynda rásim ótkizýge ýákilettik bere alady. İndet sebebinen qurbandyq shalýdy onlaın ótkizý osyǵan negizdelgen», – dep túsindirdi Qanatáli Taqyrov.
www.qurban2021.kz saıty óz kezeginde qaıyrymdylyq jasaıtyndar men muqtaj adam arasyndaǵy baılanystyrýshy qural. Tapsyrys berýshilerge rásimdi ótkizý týraly tolyq beınebaıan kórsetiledi. Munyń bári arnaıy mal soıý oryndarynda adam kóp jınalmaıtyndaı etip oılastyrylǵan. Siz sol saıttaǵy usynystarmen tolyǵyraq tanysa alasyz.
«Barlyq et muqtaj otbasylarǵa taratylady. Ony din ókilderi, ımamdar jetkizedi. Ótken jyly eriktiler kómek kórsetti. Bıyl da eriktiler et jetkizýge kómek kórsetýge daıyn», – dedi Jetisý aýdany meshitiniń bas ımamy.
Qanatáli Taqyrov mereke rásimderi men erejeleri týraly aıta kele, 85 gram altyn qunyna teń eń tómengi jetkilikte musylmandarǵa qurbandyq shalý mindetti ekenin, bul 2021 jylǵy jaǵdaı boıynsha 1 230 000 teńgeni quraıtynyn aıtty.
«Eger musylmannyń múlki, úıi, avtokóligi bolsa, sharıǵatta qurbandyq shalý mindetti. Múmkin bolsa, ol iri qara maldy qurbandyqqa shalýǵa nemese bir qoshqarmen shektelýge tıis. Qurban aıttyń negizgi máni – dindarlar arasynda meıirimdilik, jomarttyq pen qaıyrymdylyqtyń qalyptasýy ekenin túsiný kerek», – dedi din qyzmetkeri.
Qanatáli Taqyrov bul rette eshqandaı májbúrleý bolmaıtynyn aıtty. Sondaı-aq qurbandyq shalýǵa nıet bildirýshiler arnaıy saıttyń múmkindikterin úıden shyqpaı-aq paıdalanady. Bul merekeni kómekke muqtaj adamdar qatty kútedi.
Sóz sońynda Qanatáli Taqyrov barlyq dindarlardy ózderiniń rásimin shekteýge, qonaqqa barmaýǵa, jappaı is-sharalar ótkizbeýge, sanıtarlyq normalardy saqtaýǵa jáne úıde namaz oqýǵa shaqyrdy.
Aıta ketsek, Almaty qalasy musylmandardyń Dinı basqarmasy vaksına naýqanyn qoldap, osy taqyrypta meshitterde túsindirme jumystaryn ótkizedi.