Shahardyń negizgi ónerkásip pen saýda ortalyǵynyń biri retindegi Jetisý aýdanynyń mártebesi nyǵaıyp keledi. 2025 jyldyń alǵashqy bes aıynda aýdan boıynsha ónerkásip óndirisiniń kólemi 14,4%-ǵa ósip, 161,8 mlrd teńgege jetken. Bul kórsetkishke aýdandaǵy 572 kásiporynnyń belsendi qyzmetiniń arqasynda qol jetip otyr. Onyń ishinde 52-si – iri jáne orta, 520-sy – shaǵyn kásiporyn. Óńirlik komýnıkasıalar qyzmetindegi baspasóz konferensıasynda aýdan ákimi Lázzat Jylqybaeva osylaı dedi, dep habarlaıdy aqshamnews.kz
Ónerkásip salasyndaǵy joǵary ósim aýdan ekonomıkasynyń turaqtylyǵyn qamtamasyz etip qana qoımaı, búkil qalanyń qarjylyq ál-aýqatyna eleýli úles qosyp otyr. Osy kezeńde aýdan ekonomıkasyna quıylǵan ınvestısıalar kólemi shamamen 65,3 mlrd teńgege jetken. Bul – birqatar negizgi salalardyń damýyna serpin bergen negizgi faktor boldy. Atap aıtqanda, qurylys salasy 20,1%-ǵa ósip, 11,6 mlrd teńgeniń kólemin kórsetti. Bul óz kezeginde paıdalanýǵa berilgen turǵyn úıdiń jalpy aýdanynyń 15,8%-ǵa artýyna yqpal etti. Ekonomıkalyq belsendiliktiń salyq túsimine de oń áseri tıdi: óndiristik jáne ınvestısıalyq kórsetkishtiń artýynyń arqasynda Almatynyń búdjetine túsken salyq 11%-ǵa ósip, 149,7 mlrd teńgege jetti.
Sonymen qatar, aýdanda jańa jumys oryndary da qurylyp jatyr. Bul sońǵy jyldary aıtarlyqtaı ulǵaıǵan júıeli qoldaý men qarjylandyrýdyń arqasynda múmkin bolyp otyr. Infraqurylymdy jaqsartý men halyqtyń ómir súrý sapasyn arttyrýǵa baǵyttalǵan ortalyqsyzdandyrý saıasaty aıasynda Jetisý aýdanynyń búdjeti 2023 jyldyń basyndaǵy 7,5 mlrd teńgeden 2025 jyly 30 mlrd teńgege deıin tórt esege ósti. Bul qarajat eń aldymen ınjenerlik, áleýmettik jáne jol ınfraqurylymyn damytýǵa baǵyttalyp otyr. Bul óz kezeginde aýdandy ómir súrý men ınvestısıa tartýǵa qolaıly aımaq etip otyr.
Ónerkásip ósimi, qurylysqa tartylǵan ınvestısıalar, salyqtyq baza men áleýmettik baǵyttaǵy búdjet kóleminiń teńgerimdi ulǵaıýy Jetisý aýdanynyń turaqty damyp kele jatqanyn jáne turǵyndardyń ómir súrý sapasyn arttyrý úshin berik negiz qalanyp jatqanyn aıqyn kórsetedi.