Almaty qalasynda negizgi jumystyń basym baǵyty ınjenerlik jelilerdi modernızasıalaý bolyp tabylady.
Osy turǵydan alǵanda Jetisý aýdanynda birshama jumystar júzege asyryldy. Bul týraly Almaty qalasynyń ákimi Erbolat Dosaev Jetisý aýdany turǵyndarymen kezdesýinde málimdedi, dep habarlady Almaty-akshamy.kz.
Aýdandy aýyz sýmen qamtamasyz etý úshin 2019 jyly bastalǵan, jalpy uzyndyǵy 100 shaqyrymǵa jýyq sýmen qamtý men sý burý boıynsha eki tarıhı problemalyq jobany aıaǵyna jetkizýge kúsh salynǵan. Búgingi tańda «Alvıs» jaýapkershiligi shekteýli seriktestigi Saıahat, Mehkombınat jáne 1-JEO shaǵyn aýdanynda (Qazybaev kóshesi – Rysqulov dańǵyly – Tátibekov kóshesi – Raıymbek dańǵyly) uzyndyǵy 57,5 shaqyrym jelilerdi salý jáne jol jabynyn tóseý jumystaryn aıaqtady. Barlyq qujatty resimdeýdi eskere otyryp, jelilerdi paıdalanýǵa berý osy jyldyń qazan aıyna josparlanǵan.
Merdiger «Elektroremont» jaýapkershiligi shekteýli seriktestiginiń aýdannyń ortalyq jáne batys bóligin qamtıtyn Seıfýllın – Soltústik aınalym – Rysqulov – Boraldaı kósheleriniń aýmaǵyndaǵy sýmen qamtý jáne sý burý jelilerin salý jobasyn sapasyz iske asyrýy kóptegen aýdan turǵyndarynyń narazylyqtaryn týdyrdy. Bul merdiger ótken jyly ákimdiktiń talap-aryzy boıynsha qyzmetterdiń josyqsyz ónim berýshisi bolyp tanylǵan. Ákimdik qabyldaǵan sharalardyń nátıjesinde 36 shaqyrymnan 31 shaqyrymǵa deıin jelidegi jumystar aıaqtaldy. Jol jabyny qalpyna keltirildi. Qalǵan 8 shaqyrym boıynsha jumystar osy jyldyń qazan aıynyń sońyna deıin aıaqtalyp, jol jabyny qalpyna keltiriledi.
Buǵan deıin sizderge ýáde bergenimdeı, osy jyldyń maýsym aıynan bastap uzyndyǵy 80 shaqyrym sýmen qamtý jáne 71 shaqyrym káriz jelilerin salý boıynsha eki jańa iri ınfraqurylymdyq joba qolǵa alyndy. Bıyl biz 14 shaqyrym sýmen qamtý jáne 18 shaqyrym sý burý jelilerin salýǵa nıettimiz.
Osy jyldyń maýsym aıynda merdigerlermen: birinshi joba boıynsha Kemel shaǵyn aýdanynda jalpy uzyndyǵy 69 shaqyrym (sý - 60,2 shaqyrym, káriz - 8,7 shaqyrym jeli) jobany iske asyrý úshin «AlmatyInjStroı» kompanıasymen (jobalaýshy «Birlik» JSHS), ekinshi joba boıynsha sizderdiń aýdandaryńyzda uzyndyǵy 82 shaqyrym (sýmen qamtý - 19,4 shaqyrym, káriz - 62,1 shaqyrym) jelilerdi salý úshin merdiger «NKO» jaýapkershiligi shekteýli seriktestigimen (jobalaýshy «KazSanTehProekt» JSHS) kelisimderge qol qoıyldy, -dedi qala ákimi.
Osy jobalardy tıimdi iske asyrýdyń arqasynda Kemel shaǵyn aýdanyn, Soltústik aınalymnyń shyǵys bóligi men Palladın kóshesindegi saıdy ortalyqtan sýmen jabdyqtaý jáne sý burý jelilerimen qamtý 2024 jyldyń jeltoqsan aıynda aıaqtalady.