Almaty oblysynda túrli baǵdarlamalardy iske asyrýdyń arqasynda úsh myńǵa jýyq jumys orny ashylǵan.
Almaty oblysynyń arýlary memlekettik baǵdarlamalar kómeginiń arqasynda jeke isterin dóńgelente bastady, dep habarlaıdy Almaty-akshamy.kz.
«Uıǵyr aýdanynyń turǵyny Iýldýz Týraeva toqyma buıymdaryn óndirýmen aınalyssa, tekelilik Gúldana Ómirtaıqyzy kofeıná ashyp, ıgiligin kóre bastady. Ekeýi de nátıjeli jumyspen qamtý jáne jappaı kásipkerlikti damytýdyń «Eńbek» baǵdarlamasyna sáıkes «Bastaý Bıznes» oqytý jobasyna qatysyp, grantqa ıe bolǵandar», - dep habarlaıdy Almaty oblysy ákiminiń baspasóz qyzmeti.
Iýldýz Týraevanyń aıtýynsha, onyń áý bastan ismerlikke qabileti men qyzyǵýshylyǵy erekshe bolǵan. Sondyqtan ol osy baǵytta jeke bıznesin ashýdy jón kórgen. Óńirlik kásipkerler palatasyna júginip, «Bastaý Bıznes» jobasy boıynsha kásipkerlik negizderin oqyp shyqqan. Keıin «Jas kásipker» baǵdarlamasy aıasynda 500 myń teńge kóleminde grantqa ıe bolyp, bul qarjyǵa qajetti tigin mashınalaryn satyp alǵan, sóıtip, óz sehyn ashqan. Bul isten ózi ǵana paıda taýyp otyrǵan joq, sonymen qatar jergilikti jeti turǵyndy jumyspen qamtyp otyr.
Al Tekeli qalalyq ákimdiginiń málimetine súıensek, jas kásipker Gúldana Ómirtaıqyzy memlekettik grant esebinen kofeıná ashqan. Onyń bul bastamasyna «Bıznes Bastaý» arqyly oqýy úlken sep boldy. Úsh balanyń anasy Gúldana «Bıznestiń jol kartasy 2020-2025» baǵdarlamasy aıasynda 2 mln teńge grantqa ıe bolyp, qoǵamdyq tamaqtandyrý ortalyǵyn ashýǵa qajetti qural-jabdyqtar satyp aldy. Qalanyń ortalyǵynda ornalasqan MELISSA kofeınásynda qazir 3 adam jumys isteıdi. Onda kofe jáne basqa da sýsyndardan bólek, kondıterlik ónimder de pisiriledi.
Kásipkerler palatasy Tekeli qalalyq fılıalynyń dırektory Turysbek Jumadilov tek bıyldyń ózinde «Bastaý Bıznes» kásipkerlik negizderine oqytýdy 73 adam aıaqtaǵanyn aıtady.
Resmı málimetter boıynsha, jalpy, bıylǵy jyly Almaty oblysynda «Bıznestiń jol kartasy», «Jumyspen qamtý jol kartasy», «Eńbek» baǵdarlamalary jáne «Jetisý» óńirlik baǵdarlamasy sheńberindegi qarjy kólemi 23 mlrd teńgege jetkizilgen. Birinshi jartyjyldyqta jalpy somasy 7,5 mlrd teńgelik 990 joba qarjylandyrylyp, 2750 turaqty jumys orny ashylǵan.
