Elimizde jetim balalardy qabyldaıtyn kásibı otbasy ınstıtýty engiziledi.
Oqý-aǵartý vıse-mınıstri Edil Ospan ata-ananyń qaraýynsyz, turmystyq qıyn jaǵdaıda qalǵan balalardy qabyldaýshy otbasy ınstıtýtyn zańǵa engizý máselesin túsindirdi, dep habarlaıdy aqshamnews.kz
«Balalar osyndaı jaǵdaıǵa tap kelgen kezde olar balalardy qoldaý ortalyqtaryna, ıaǵnı, ınternattarǵa ornalastyrylady. Qandaı da bir otbasyda ómir súrgen bala úshin bul stress. Sondyqtan zań jobasy arqyly arnaıy daıyndyqtan ótken, akredıtasıadan ótken otbasylar tańdalyp, balalar solarǵa ýaqytsha ornalastyrylady. Bul otbasylar 24/7 rejıminde jumys isteıdi, ıaǵnı kez kelgen ýaqytta osyndaı jaǵdaı bola qalǵan jaǵdaıda balalardy qabyldaýǵa, olarǵa otbasylyq qamqorlyq kórsetýge daıyn bolýǵa tıis», - deıdi Edil Ospan.
Onyń sózinshe, qabyldaýshy otbasylarǵa túskennen keıin birinshi kezekte balalardy ári qaraı óziniń turaqty otbasyna ornalastyrý mehanızmderi jumys isteıdi. Iaǵnı, balalardy qabyldap alatyn ata-anasynyń jaqyn týystary izdestiriledi.
Al zańda jaqyn týystar tizimi naqty kórsetilgen. Olar: atasy, ájesi jáne ata-anasynyń týǵan baýyrlary men apa-qaryndastary. Mundaǵy negizgi saıasat – ata-anasynyń qamqorlyǵynsyz qalǵan balalardy jaqyn týystaryna berý.
«Qabyldaýshy otbasylar boıynsha zań jobasyn ázirleý barysynda pılot ótkizdik. Osy zań jobasynda birqatar norma usynylyp otyr. Birinshi, mundaı otbasylardy psıhologıalyq dıagnostıkadan ótkizý. Odan keıin olardy oqytý, akredıtasıadan ótkizý. Mundaı sharany Aqmola oblysynda ótkizdik. Qazir osy tásilmen 4 otbasy jumys istep jatyr. Olar bala qabyldaýǵa daıyn, tájirıbeli, balalarmen jumys isteýge mashyqtanǵan otbasylar», - deıdi ol.
Vıse-mınıstrdiń sózinshe, zań jobasy qabyldanǵan jaǵdaıda bul norma zańdy kúshine engenshe 6 aı ýaqyt kerek. Jergilikti ákimdikter osy aralyqta zańnamada belgilengen tártipke sáıkes, qabyldaýshy otabsylardy daıyndaıdy. Osylaısha norma kezeń-kezeńimen engiziledi.