Ámir 6 jasyna deıin tek qana qazaqsha sóılegen.
Ámir Kárim orys-aǵylshyn tilderi oqytylatyn mektepte bilim alǵan, al basqa tilderdi qarym-qatynas barysynda meńgergen, dep habarlaıdy aqshamnews.kz Otyrar.kz-ke silteme jasap.
4 tildi jarty jylda meńgergen, 7 tilde erkin sóıleıtin shymkenttik polıglot bul áli múmkindiginiń shegi emes ekenin jáne jaqyn arada óz rekordyn jańartatynyn aıtady. Emır 6 jasqa deıin tek qazaqsha sóılegen. Mektepte orys, aǵylshyn tilderin jetik meńgergen. Búginde polıglot ıspan, koreı, fransýz jáne latyn tilderinde sóıleı alady. Ol bul tilderdi jarty jyldyń ishinde ıgergen.
"Birinshi synypta júrgende-aq ata-anam tilderdiń men úshin ońaı ekenin túsindi. Sóıtip men kóptegen tildi úırene bastadym. Ispan tilin 5-6 aıda, fransýz tilin 7 aıda úırendim jáne Ispanıaǵa saparymnyń aldynda qalǵan tilderdi de meńgerdim. Olardy zertteýge kóbirek ýaqyt qajet boldy", - deıdi polıglot.
Oqýda ǵana emes, sportta da jetistikke jetip júrgen Ámir 10 jasynan bastap fýtbol oınaıdy. Tipti shetelde, Ispanıada júrgende ol "Torreveha" fýtbol klýbynda jattyqqan. Qazir Ámir "Ordabasy" jastar akademıasynyń negizgi oıynshysy. Ol til bilýdiń ákeletin basty paıdasy – saıahattaǵy shekteýlerdi alyp tastaý deıdi.
"Ispanıada biz chempıon atandyq. Odan keıin byltyr shymkenttik "Ordabasy" komandasymen "Arman kýbogyn" jeńip aldyq. Qazir jańa Ordabasy lıgasymen jańa jobamen ekinshi oryndamyz, aldymyzda "Qaırat". Biz chempıondyq ataqqa úmittenemiz. Osy jyly komandamen Túrkıaǵa barǵanymda shet tilin bilýim taǵy da kómektesti", - deıdi Ámir.
Birneshe tildi erkin meńgergen Ámir ýnıversıtette menedjment salasy boıynsha oqıdy. Kópbalaly otbasynda ósken Ámirdiń qaryndastary da til úırenýge tyrysyp júr, olar qazirdiń ózinde úsh-tórt tilde sóıleıdi.