Almaty oblysy boıynsha paıdalanylmaı jatqan 2 mıllıon gektarǵa jýyq jer anyqtalǵan.
«Atajurttan jer buıyrmady». Almaty oblysynyń Teskensý aýylyndaǵy mal baqqan sharýalar jaıylymǵa jarymaı otyr. Al halyq qoldanysyna berilgen jazyqqa jurttyń tórt túligi syımaıtyn kórinedi, dep habarlaıdy Almaty-akshamy.kz Almaty.tv-ge silteme jasap.
Teskensý aýylyndaǵy halyqtyń deni aýyl sharýashylyǵymen aınalysady. Kúnkóris kúnine aınalǵan sharýany damytyp, mal basyn kóbeıtkisi kelgenmen, jer jetpeıdi. Sebebi aýyl tóńiregindegi jazyqtyń kóp bóligin kezinde kásipkerler alyp alǵan kórinedi.
«8,5 myń turǵyny bar aýylda 6 myń bas qoı, 2700 bastaı iri múıizdi qara, 1500 bastaı jylqy tirkelgen. Jer joq, qaıda jaıamyz? Árkimge jalynamyz. Jerdi alyp alǵan latıfýndıserge tórt túlikti jaıý úshin qoı, jylqy berip, kún kórip júrmiz», – dedi Teskensý aýylynyń turǵyny Asqar Seısenqulov.
Tipti halyqty qorqytyp otyrǵandar da tabylady eken.
Egin oryp bolǵannan keıin osy jerge jaıyp jatyrmyz. 5-10 kúnnen keıin bul jerge de óte almaımyz. Halyqtyń malyn qaıda aparamyn? Byltyr maǵan: «Bul jerge ótýge bolmaıdy. Jekemenshik jer. Bul kisilerdiń beretin óz adamy bar. Tıisti adamǵa habarlasamyn. Kózińdi qurtyp jiberedi» degen kezder de boldy. Qorqyp ta qaldym», – dedi malshy Abaı Qasqarov.
Jergilikti ákimdik ókiliniń aıtýynsha, aýyl mańyndaǵy 1000 gektardan asa aýmaqty 2000 jyldyń basynda 3 kompanıa aýdannyń jer qorynan 49 jylǵa jalǵa alǵan. 2 kásipker jazyqqa júgeri egip, egistik maqsatynda áli de paıdalanyp júrgen kórinedi.
«Agroıýnıon» JSHS 250 ga jer telimin alǵan. Onyń nysanaly maqsaty – jaıylym. Qazirgi tańda oblystyq jer basqarmasyna jiberildi. Jer ınspeksıasy «jerdi qaıtarý» boıynsha sotqa berý jumysyn júrgizip jatyr», – dedi Teskensý aýyldyq okrýgi ákiminiń orynbasary Elaman Elýbaı.
Al prokýratýra dereginshe, oblys boıynsha paıdalanylmaı jatqan 2 mıllıon gektarǵa jýyq jer anyqtalǵan. Búginde sonyń 114 myńy qaıtarylypty. 1,5 myń gektardaı jer telimi Teskensý aýyldyq okrýginiń qoǵamdyq jaıylymy retinde rásimdelgen. Alaıda eldimekenniń ózindegi jurt berilgen jazyq aýyldan alys jatqanyn aıtady.