2023 jylǵy 16 naýryzda ótken Túrki memleketteri uıymynyń kezekten tys samıtinde Ózbekstan prezıdenti Shavkat Mırzıóev tabıǵı apattar kezinde áreket etetin mamandandyrylǵan halyqaralyq qurylymdarmen yntymaqtastyqty kúsheıtý qajettigine basa nazar aýdarǵan edi.
Samıt barysynda ol jer silkinisi qurbandaryn eske alý jáne tabıǵı apattarǵa qarsy halyqaralyq kúsh biriktirýdiń mańyzdylyǵyn atap ótip, Eske alý jáne yntymaqtastyq kúnin belgileýdi usyndy, dep habarlaıdy aqshamnews.kz.
Atalǵan bastama 2025 jyly óz nátıjesin berdi. 29 sáýirde Nú-Iorktegi Birikken Ulttar Uıymynyń shtab-páterinde BUU Bas Assambleıasy Ózbekstannyń usynysymen 29 sáýirdi Halyqaralyq jer silkinisi qurbandaryn eske alý kúni dep jarıalaý jónindegi qarardy qabyldady. Qarardy álemniń ár túkpirinen 80-nen astam memleket birlesip qoldady.
Bul kún alǵash ret 2026 jyldyń 29 sáýirinde atalyp ótedi. Tańdalǵan data — 1966 jyly Tashkentte bolǵan joıqyn jer silkinisiniń 60 jyldyǵymen sáıkes keledi.