Memleket basshysynyń osy jolǵy Joldaýy ekonomıkalyq máselelerdi kóteretini belgili edi. Sebebi ekonomıka shuǵyl kirisip, qolǵa alýdy talap etedi. Osynyń barlyǵy munaı máselesimen tyǵyz baılanysty ekenin alǵa tartqan QR UǴA Prezıdenti, akademık Murat Jurynov memlekettiń negizgi tabys kózi de munaı ekenin basa atap ótti.
"Alpys mıllıon tonna munaıdy KTK arqyly syrtqa shyǵaryp satatynbyz. Qazir muny toqtatsaq, bizdiń barlyq múmkindigimiz on mıllıonǵa jeter-jetpes bolady" dep akademık dabyl qaǵý keregin aıtty.
Akademıktiń pikirinshe, Qazaqstannan búdjet qoryna ne túsedi, qaıdan túsetinin eseptep, únemdeý qajet. Óıtkeni halyqaralyq jaǵdaı osyny talap etedi. Buǵan qosa ol Reseıdegi sanksıany, Ýkraınadaǵy soǵysty eskerip, jumyssyzdyqty boldyrmaý, jemqorlyqty joıý jáne elge qyzmet berý degen úsh baǵyt boıynsha jumysty jalǵastyrý keregine mán berdi.
Ál Farabı atyndaǵy QazUÝ jýrnalısıka fakúltetiniń dekany Sansyzbaı Mádı agrarly el ekenimizdi alǵa tartyp, paıdalanylmaı jatqan jer taǵdyry týraly óz oıyn bólisti.
"Baı men kedeı arasyndaǵy tartystar osy jer máselesine qatysty týyndap otyr. Memleket basshysy bul máseleni der kezinde, halyqqa kerek kezinde qozǵaǵanyna tánti boldym" dedi S.Mádıev.