Bul depýtat, «Aýyl» partıasynyń múshesi Anas Baqqojaevtyń usynysy.
Onyń aıtýynsha, keı sharýa qojalyǵyn, jerlerdi ákimder men olarǵa jaqyn azamattar ıelenip otyr, dep habarlaıdy Almaty-akshamy.kz
Májilis depýtatynyń sózine sáıkes, sheneýnikter men olıgarhtardyń aýqymdy jer, sharýashylyq ıelenýine basqarý qurylymy sebep bolyp otyr, jerdi bólý quzyreti bar jergilikti ákimdik zańsyz áreketterge barady.
«Jer konkýrsyn ótkizý jergilikti ákimdik quzyrynda. Men oǵan qarsymyn. Adam bar jerde adamı faktor bolady. Sondyqtan keı sharýa qojalyǵyn, jerlerdi ákimder men olarǵa jaqyn azamattardyń ıelenýi osydan týyndap otyr», - dedi depýtat.
Osy oraıda ol máseleniń sheshimi retinde sıfrlandyrý jumysyn engizýdi usyndy.
«Qazir sıfrlandyrý damyǵan kezeń. Barlyq jer konkýrsyn elektrondy túrde ótkizse, ony árbir qalaǵan adam ala alady», - dedi Anas Baqqojaev.
Sonymen qatar depýtat paıdalanylmaǵan aýylsharýashylyǵy jerlerin qaıtarý máselesin de atap ótti. Óıtkeni jerdi tıimsiz paıdalanǵan azamattardy anyqtaý barysynda tıisti ınspeksıa salǵyrttyq tanytyp otyrǵan kórinedi.
Úkimet azamattarǵa jerdi 49 jylǵa bergennen keıin ol merzim bitpeı, jerdi qaıtaryp ala almaıdy. Olaı etse, azamattardyń konstıtýsıalyq quqyǵy shekteledi. Sondyqtan Úkimet berilgen jer qanshalyqty tıimdi paıdalanyldy, topyraq qunarlylyǵy saqtaldy ma, sol máselelerdi ınspeksıa arqyly tekseredi.
«Eger talapqa saı bolmasa, dáleldep, sot arqyly jerdi qaıtarý joly bar. Alaıda ınspeksıa jumysy salǵyrt júrip jatyr», - dedi depýtat.