2 mamyrda Ábilhan Qasteev atyndaǵy QR Memlekettik óner mýzeıi qorynan 1941-1945 jyldardaǵy Uly Otan soǵysyna jáne Keńes Odaǵynyń batyry, Qazaqstannyń Halyq batyry, Qazaqstan Respýblıkasy armıasynyń generaly Saǵadat Qojahmetuly Nurmaǵambetovtyń týǵanyna 100 jyl tolýyna arnalǵan «Jeńistiń juldyzdy saǵaty» atty kórme ashylady.
Ekspozısıada keńes zamany men qazaqstandyq sýretshilerdiń, UOS qatysýshylarynyń 50-den asa týyndysy, soǵys batyrlary men tyl eńbekkerlerine arnalǵan kartınalar qoıylady. Kórmeniń ashylýynda kórermender áskerı-tarıhı mýzeıdiń dırektory A.Baıqadamovanyń qoldaýymen usynylǵan general Saǵadat Nurmaǵambetovtiń jeke zattaryn tamashalaı alady.
«Jeńistiń juldyzdy saǵaty» kórmesiniń mazmuny san qyrly. Kórmeniń ınteraktıvti aqparattyq súıemeldenýi uly jeńis úshin maıdanda shaıqasqan qazaqstandyqtar men Uly Otan soǵysyna qatysýshy qazaqstandyq sýretshilerge arnalǵan.
«Otandy qorǵaýda bir ekpinmen ár túrli ult ókilderi qatar soǵysqan. Bizge belorýs, grýzın, qazaq, lıtva, orys, ózbek sýretshileriniń týyndylarynda kórinis tapqan barlyq halyqtyń birigýin erekshe atap ótý mańyzdy. Joǵary kásibı deńgeıde oryndalǵan olardyń shyǵarmalary ómirge, qarapaıymdylyqqa jáne shynaıylyqqa, tragedıaǵa, poetıkalyq mazmunǵa jáne erlikke toly. Olar borysh, elge tóngen qaýip, sonymen qatar Jeńis týraly áńgimeleıdi», – deıdi kórme jetekshisi S.Kóbjanova.
Keskindeme, grafıka jáne músin ónerinen túrli urpaq sheberleri, ár ulttyń daryndy sýretshileri beınelegen týyndylardy tereń túsinýmen qatar, kórme zamandastarymyzdy álemdegi birlik, beıbitshilik pen ómirdi qorǵaýǵa shaqyrady.
Kórme 30 mamyrǵa deıin jalǵasady.