«Uly Dala Joryǵy-2023» marafon-báıgesiniń jeńimpazdary marapattaldy
«Uly dala joryǵy» marafon-báıgesiniń 14-kezeńi aıaqtalyp, tarlan tarıhtyń kýágeri bolǵan, rýhanıaty jańǵyrǵan elimizdiń rýhanı astanasy Túrkistan tórinde jeńimpazdar anyqtaldy, dep habarlaıdy almaty-akshamy.kz.
Tańǵy saǵat 7:00-den bastap sońǵy 50 shaqyrymdy eńserýge attanǵan 4 komanda ishinde Jetisý oblysynyń komandasy top jaryp, máre syzyǵyn birinshi bolyp kesti.
On tórtinshi kúnniń qorytyndysy boıynsha komandalardyń jalpy ýaqyty:
Jetisý oblysy – 93 saǵat 47 mınýt 43 sekýnd;
Aqtóbe oblysy – 95 saǵat 06 mınýt 37 sekýnd;
Almaty qalasy – 104 saǵat 23 mınýt 57 sekýnd;
Abaı oblysy – 112 saǵat 12 mınýt 46 sekýnd.
Jeńimpazdardy marapattaý saltanatyna QR Týrızm jáne sport vıse-mınıstri Sársen Quranbek, «AMANAT» partıasynyń atqarýshy hatshysy Dáýlet Káribek, QR Ulttyq sport qaýymdastyǵynyń prezıdenti Islambek Saljanov, Túrkistan oblysy ákimi apparatynyń basshysy Erkeǵalı Álimqulov pen «JORYQ» at sporty federasıasynyń prezıdenti Baqytjan Turlybekov arnaıy qatysty.
«Uly dala joryǵy» álemde joq respýblıkalyq marafon báıge. Byltyr bastalǵan bul jobanyń aýqymy keńeıip, el ishinde keńinen qoldaý tabýda. Keler urpaqqa qasıetti at ustaý men báıge ónerin jetkizý asa jaýapty borysh. Búgingi is-shara osy jolda atqarylyp jatqan naqty istiń biri. Óıtkeni ol qazirgi jahandaný dáýirindegi ulttyq bolmysymyzdy saqtaýdyń bir joly. Sol sebepten de Ulttyq sport qaýymdastyǵy 2 jyl qatarynan «Uly dala joryǵy» jobasyna seriktes bolyp, qoldap keledi.
Búginde Prezıdent Qasym-Jomart Kemeluly Toqaevtyń tikeleı nazarynyń arqasynda ulttyq sportqa erekshe kóńil bólinýde. Memleket basshysy keler jyly Astanada ótetin V Dúnıejúzilik kóshpendiler oıynyna da aıryqsha nazar aýdaryp otyr. «Uly dala joryǵyna» qatysqan shabandozdar kóshpendiler oıynynda olja salady degen senimdemin» dep aıtty óz quttyqtaý sózinde QR Ulttyq sport qaýymdastyǵynyń prezıdenti Islambek Saljanov.
Sońǵy meje – Túrkistan qalasyna deıin eń qysqa ýaqyt ishinde jetken Jetisý oblysynyń komandasy bas júlde – 18 000 000 teńge (Reglamentke saı) kólemindegi júldemen marapattaldy.
Aqtóbe oblysy komandasy 2-shi oryn úshin – 16 000 000 teńge, al 3-shi oryn ıegeri Almaty qalasynyń komandasy 9 000 000 teńgeni qanjyǵasyna baılady. Tóreshiler sheshimimen, márege 4-shi bolyp kelgen Abaı oblysynyń komandasyna 5 000 000 teńge berildi.
Sonymen qatar, bul kezeńde Mańǵystaý oblysynyń Adaı jylqysy rekord jasady. «Rekord» komandasyndaǵy 21 jastaǵy Maǵjan Abdoluly 1 300 shaqyrymnyń sońǵy 50 shaqyrymyn baǵyndyrýǵa tańǵy saǵat 7:10-da attanyp, Túrkistandaǵy máre syzyǵyn 08 saǵat 44 mınýt 09 sekýndta birinshi bolyp kesti. Astanadan Túrkistanǵa deıingi 1 300 shaqyrymdy bastan-aıaq 1 atpen eńserýdi maqsat etken «Rekord» komandasynyń quramy Astana qalasy, Mańǵystaý men Jetisý oblystarynyń shabandozdarynan quralǵan.
Márege jetisýlyq shabandoz ekinshi bolyp kelse, artynsha astanalyq shabandoz jetip, «Rekord» komandasy dittegen maqsatyn oryndady. 1 300 shaqyrymdy 1 atpen baǵyndyrǵan azamattar 1-oryn úshin 2,5 mıllıon teńge, 2-orynǵa - 2 mıllıon teńge, 3-orynǵa - 1,5 mıllıon teńge kólemindegi syıaqy aldy.
«Rekord» komandasynyń nátıjesine toqtalsaq, Mańǵystaý oblysynyń jylqysy 1 300 shaqyrymdy 98 saǵat 44 mınýt 47 sekýndta baǵyndyrdy. Al Jetisý oblysynyń tulpary 100 saǵat 04 mınýt 34 sekýndta eńserdi. Úshinshi, astanalyq sáıgúliktiń ýaqyty 104 saǵat 28 mınýt 11 sekýndty quraıdy.
Sonymen birge, komandasy jarystan shyǵyp qalsa da, joryqty óz erkimen jalǵastyryp, 1 300 shaqyrymdy jeke dara baǵyndyrǵan 10 shabandozdyń árqaısysyna tóreshiler sheshimimen 1 mıllıon teńge kólemindegi qarjylaı syılyq berildi.
Eki aptalyq alamanǵa qatysyp, shabandozdarmen birge 1 300 shaqyrymdy baǵyndyrǵan Beıneý aýdanynyń týmasy, Qazaqstannyń qurmetti qurylysshysy, elge belgili veloshabandoz Rabbım Borashovqa da tóreshiler «Eń úzdik jankúıer» nomınasıasyn belgilep, 1 000 000 teńge kóleminde qarjylaı syılyq tabystaldy. Mańǵystaýdyń «Kókmoınaq» komandasyna jankúıer veloshabandoz buǵan deıingi marafon-báıgege qatysyp, Túrkistanǵa deıingi 1 200 shaqyrymdy baǵyndyrǵan bolatyn.
Jalpy 5-19 qyrkúıek aralyǵynda marafonshylar elordadan Túrkistan qalasyna deıin 1 300 shaqyrymnan asa qashyqtyqty basyp ótti. Marafon 14 kezeńge bólindi. Elimizdiń 19 óńirinen marafonǵa 1 komandadan qatysty. Marafonǵa qatysýshylarǵa Uly Dala rýhyn sezinýge jáne kıeli jerlerimiz – Joshy han, Alasha han keseneleri, túrki rýhanıatynyń besigi Túrkistan qalasy sıaqty tarıhı oryndarǵa zıarat jasaýǵa múmkindik týdy.
Aıta keteıik, «Uly dala joryǵy» marafon-báıgesi respýblıkalyq «JORYQ» at sporty federasıasynyń, QR Týrızm jáne sport mınıstrliginiń uıymdastyrýymen, «AMANAT» partıasynyń jáne QR Ulttyq sport qaýymdastyǵynyń qoldaýymen ótti.
Al, marafon-báıgeniń Bas seriktesi – «Sport Qory» týrızm ındýstrıasy men sportty qoldaý qory boldy.