Uly Otan soǵysynyń qan maıdanyn jaıaý keshken, keýdesindegi ordenmedaldary syńǵyrlap, taıaǵyna súıenip júretin ardager atalarymyzdyń sany azaıyp qaldy búginde. Al keıingi urpaq tarıhtyń tereńine ketip bara jatqan sol surapyl soǵystyń qasiretin, qazirgi beıbit zamannyń qalaı kelgenin, qadirin bilip júrýge tıis.
Bıylǵy mamyr aıynda Uly Jeńiske 78 jyl tolady. Jeńis kúni keýdemizge sol kúnniń belgisi retinde birazǵa deıin Georgıı lentasyn taǵyp kelgen bolatynbyz. Ol lenta qoǵamda biraz daý týdyryp, qarsy shyqqandar az bolmaǵan. Nátıjesinde sary, qara tústi Georgıı lentasynyń ornyn basqan ózimizdiń otandyq, oıýmen kómkerilgen «Jeńis» lentasy jasaldy. Bul lenta áleýmettik jelilerde birden qoldaý taýyp ala jóneldi. Sosyn baryp resmı bekitildi. Kóńilge jyp-jyly áser beretin lentamyz táýelsiz Qazaqstannyń Týymen tústes. Iá, «Jeńis» lentasy kók tústi jibek matadan daıyndalǵan.
Onyń uzyndyǵy – 30, al eni – 3 sm. Ulttyq oıýmen kómkerilgen lentanyń eki shetinde «Otan soǵysy» ordeni beınelengen. Búginde jyl saıyn elimizde mereke qarsańynda «Jeńis» lentasy turǵyndarǵa tegin taratylyp júr. Bul lenta jaı shúberek emes, ony atalarymyzdyń qan maıdanda tógilgen qany men jeńis úshin dep alǵa umtylǵanda tamshylaǵan mańdaı teriniń belgisi hám jas urpaqtyń tarıhqa qurmeti dep tanýymyz kerek.
Osynaý Jeńistiń sımvolyn otanshyldyqtyń jarqyn úlgisi desek te qatelespeımiz. Kógildir lentamyz ár ulannyń keýdesinde jelbirep, olardyń patrıottyq sezimin oıatyp jatsa, maqsatymyzdyń oryndalǵany. Byltyr Almatyda Jeńis kúnine oraı 40-tan astam isshara uıymdastyryldy. Soǵys batyrlary beınelengen 40 bılbord ornatylyp, jeńis taqyrybynda qalanyń barlyq medıabordynda jáne metrobeketterinde rolıkter ornalastyryldy. 20 myń «Jeńis» lentasy daıyndalyp, qala turǵyndaryna taratylǵan bolatyn. Árıne, bıyl da osy isshara zańdy jalǵasyn tabady. Taqyrypqa oraı aıta ketsek, Almatyda 59 Uly Otan soǵysynyń ardageri jáne 8243 tyl eńbekkeri turady.