Kelesi aptadan bastap 4 paıyzdyq avtonesıe boıynsha elektrondy kezek engiziledi.
Osyǵan baılanysty Almaty-akshamy.kz jeńildetilgen avtonesıege qatysty 10 mańyzdy suraqtyń jaýabyn usynady.
Kezekke ilingen adam salonǵa baryp, kólik tańdaı beredi. Odan keıin bankke qujat aparý qajet. Dál osyndaı tártippen aldaǵy 30 jyl boıy baǵdarlamanyń qarjysy aınalyp, 70 myńnan astam adamǵa avtokredıt beriledi.
Elektrondy kezek qashan jáne qaı jerde ashylady?
Elektrondy kezekke arnalǵan autonesie.kz saıty jasaldy. Portal ótinim qabyldaý úshin 6 aqpan kúni saǵat 10:00-de ashylady. Oǵan kompúter arqyly kirý kerek. Árbir adam óziniń elektrondy sıfrlyq qoltańbasyn qoldanady. Sondyqtan kompúterde NCALayer baǵdarlamasy bolýy qajet.
Ótinimniń jaýabyn uzaq kútemiz be?
Jaýaby tez kelýi kerek. Caıtqa kirgennen keıin «Ótinim berý» batyrmasyn basyp, elektrondy sıfrlyq qoltańbany qoldanasyz. Sol kezde adamnyń aty-jóni men jeke sáıkestendirý nómiri avtomatty túrde shyǵady. Odan keıin tek telefon nómiri men avtoóndirýshini ǵana engizý kerek. Sońynda ótinimdi sıfrlyq qoltańbamen rásimdep, jibere salasyz. Saıtta ótinimniń maquldanǵany da kórsetiledi. «Siz sátti tirkeldińiz» degen jazý shyǵady. Jeke kabınetke habarlama keledi.
Ótinimde kóliktiń modelin kórsetýge bola ma?
Ótinimde tek avtoóndirýshini ǵana kórsetý kerek. Ol jerde eki kásiporyn bolady. Birinshisi – «SaryarqaAvtoProm» JSHS, ekinshisi - Hyundai Auto Trans. Ózińizge unaıtyn kólikti shyǵaratyn kásiporyndy belgileısiz. Al salonǵa barǵasyn modeldi tańdaısyz. Aıta keterlik jaıt, avtoóndirýshini belgilep, ótinimdi jibergennen keıin ony aýystyrýǵa bolmaıdy.
Salonǵa qaı kezde barý kerek?
Ótinim maquldanǵannan keıin salonǵa baryp, kóliktiń modelin tańdaýǵa bolady. Satylymda bolsa, tólem esepshoty beriledi. Onymen bankke barasyz. Sol jerde tólem qabilettiligi tekseriledi. Bári rastalsa, kepilhat beriledi. Ony avtosalonǵa aparý kerek. Kólikti rásimdeý sharalaryn 6 kúnniń ishinde aıaqtaý kerek.
6 kúnniń ishinde kólikti salonnan shyǵaryp alý kerek pe?
Joq, 6 kún qujat rásimdeýge beriledi. Salonda siz tańdaǵan model bar bolsa, birden satyp alýǵa bolady. Bolmaǵan jaǵdaıda, kólikterdi jetkizý josparyn suraý kerek. Eger qajetti kólik aldaǵy eki aılyq josparda tursa, avtoóndirýshi ony 60 kúnniń ishinde jetkizip berýge mindetti. Josparda bolmasa, basqa modeldi tańdaýǵa týra keledi.
Ótinimdi qabyldaý lımıti bar ma?
Iá, kelesi aıda tek 761 ótinim ǵana qabyldanady. Sebebi revolverlik aınalymmen, ıaǵnı, buǵan deıin berilgen avtonesıelerden 7,6 mıllıard teńge tústi. Bunyń barlyǵy - bankterge aı saıyn aýdarylatyn tólemder. Al baǵdarlama shartyna sáıkes, avtokredıtten túsken qarjy qaıtadan jeńildetilgen nesıege jumsalýy qajet. 4 paıyzdyq kredıttiń shekti somasy – 10 mıllıon teńge. Demek, kelesi aıda 7,6 mıllıard teńge 761 adamǵa avtokredıt berýge jetedi. Ótinim sany osy kórsetkishke jetken boıda portal jabylady.
Kelesi aıda da ótinim berýge bola ma?
Naýryz aıynda taǵy ótinim qabyldanady. Biraq ol kezde 100 adam ǵana ótinish jibere alady. Sebebi bir aıdyń ishinde aınalym qarajattyń kólemi kóp bolmaıdy. Jalpy, dál osyndaı tártippen aldaǵy 30 jyl boıy baǵdarlamanyń qarjysy aınalyp turady degen jospar bar. Osy ýaqyttyń ishinde 70 myńnan astam adamǵa jeńildetilgen avtonesıe beriledi.
Aqpanda tólem qabilettiliginen rastaı almaǵandardyń orny qaı kezde bosaıdy?
Aqpan aıynda bireýdiń ótinimi maquldanyp, artynan bankten óte almasa, onyń orny tek bir aıdan keıin ǵana bosaıdy. Sebebi 761 adamnan turatyn pýl jasaqtalady, al portal kelesi aıǵa deıin jabyq turady. Sondyqtan mamandar ótinim bererdiń aldynda avtokredıtti tóleýge shamańyz jete me, joq pa, osy máseleni aldyn ala pysyqtap alýǵa keńes berip otyr. Áıtpese, bireýdiń kezegin ustap turasyz.
Portal ótinimdi qabyldamaýy múmkin be?
Portaldyń ózi ótinimdi keri qaıtarýy múmkin. Birinshiden, adam osy baǵdarlama boıynsha buryn kólik alsa, ótinim qabyldanbaıdy. Bir adam ótinimdi ekinshi ret jiberse, sondaı-aq, bir aılyq pýl tolyp ketken jaǵdaıda ótinim keri qaıtarylady. Elektrondy kezekke tek kelesi aıda ǵana turýǵa múmkindik bolady.
Avtosalondarda jasalǵan burynǵy kezek sanala ma?
Joq. Barlyǵy jańa portal arqyly jasalady. Al avtosalondar da, bankter de kelgen adamnyń autonesie.kz saıtynda tirkelgen-tirkelmegenin tekserip otyrady.
Baǵdarlama sharttary burynǵydaı. Shekti soma – 10 mıllıon teńge. Eger kóliktiń baǵasy odan qymbat bolsa, nesıe alýshy óz qaltasynan qosady. Avtokredıttiń merzimi – 7 jyl, alǵashqy jarnasyz.