Adam quqyqtary jóninde BUU Joǵary komısary Qazaqstanda «Adam quqyqtary jóninde ýákil» týraly zańnyń qabyldanýynan habardar.
Bul adam quqyqtaryn qamtamasyz etý jáne qorǵaý salasynda elimiz alǵan mindettemelerdi oryndaýǵa septigin tıgizedi. Bul týraly Jenevada qazaqstandyq ombýdsmen Elvıra Ázimovamen ótken kezdesýde belgili boldy, dep habarlaıdy Almaty-akshamy.kz 24.kz-ke silteme jasap.
«Adam quqyqtary jóninde BUU Joǵary komısary Mıshel Bacheletpen kezdesý barysynda Qazaqstan Prezıdenti bıyl 16 naýryzda jarıalaǵan bastamalaryn júzege asyrý máseleleri men múmkindikterin uzaq talqyladyq. Bachelet hanym bastamalarǵa qoldaýyn bildirdi, biraq osy bastamalardyń nátıjelerin barynsha keń usynýdyń mańyzyn atap ketti. Qańtar oqıǵalary boıynsha tergeý qalaı ótip jatqanyn talqyladyq. Árıne azamattarymyzdyń prosesýaldyq quqyqtarynyń saqtalýy boıynsha alańdaýshylyq bildirdi. Sondaı-aq tergeý nátıjeleri buqaralyq aqparat quraldarynda keń jarıalanýy kerektigi aıtylǵan», - deıdi QR Adam quqyqtary jóninde ýákil Elvıra Ázimova.
Adam quqyqtaryn qorǵaýshy beldi halyqaralyq uıymdarmen kezdesý barysynda Qazaqstan delegasıasynyń músheleri olardy syndarly yntymaqtastyqqa jáne elimizdiń quqyq qorǵaý oryndarynyń jumysyn jetildirý boıynsha birlesip eńbek atqarýǵa shaqyrdy.
«Únemi halyqaralyq tergeý qajet degen áńgime qozǵalǵanda, men birden bulaı bolmaıdy, óıtkeni bul halyqaralyq uıymdardyń, ózge memlekettiń ishki isterine aralasýy dep aıtamyn. Al saraptaý jumysyna, máselen, quqyq qorǵaý oryndary men kúshtik qurylymdardyń jumysyn taldaýǵa kómektese alady. Bizdiń memleketimiz de buǵan kelisedi dep oılaımyn. Biraq taǵy da qaıtalap aıtamyn, eshqandaı halyqaralyq tergeý bolmaıdy, naqty baǵa bere alatyn óz mamandarymyz ben sarapshylarymyz jetkilikti», - deıdi Adam quqyqtary úshin hartıa» QQ atqarýshy dırektory Jemis Turmagambetova.