2024 jyldyń jeltoqsan aıynda Qazaqstanda aýa raıy kúrt ózgeristerge ushyraýy múmkin. Qazgıdromet jarıalaǵan boljamǵa sáıkes, temperatýralyq fon klımattyq normaǵa jaqyn bolady, biraq jaýyn-shashyn mólsheri respýblıkanyń basym bóliginde normadan joǵary bolmaq, dep habarlaıdy aqshamnews.kz
Soltústik, Ortalyq jáne Shyǵys Qazaqstan oblystarynda aıdyń birinshi onkúndiginde túnde aýa temperatýrasy -10°S-tan -3°S-qa deıin tómendeıdi. Kúndiz temperatýra 0-den -8°S-qa deıin aýytqıdy. Bul aımaqtarda qar, burqasyn, ekpindi jel men sýyq kúnder bolady.
Ońtústik, ońtústik-shyǵys aımaqtarda aýa temperatýrasy túnde -5°S-tan +5°S-qa deıin ózgeredi. Taýly aımaqtarda temperatýra -10°S-tan -15°S-qa deıin tómendep, kúndiz -5°S-tan +12°S-qa deıin aýytqıdy. Bul aımaqtarda jańbyr men qar aralas jaýyn, sondaı-aq qar jaýýy yqtımal.
Batysta túnde temperatýra -1°S-tan +8°S-qa deıin aýytqyp, kúndiz +1°S-tan +8°S-qa deıin kóterilmek. Onkúndiktiń sońynda temperatýra kúndiz -5°S-qa deıin tómendeýi múmkin.
Jeltoqsan aıynda, ásirese soltústik-batys jáne soltústik aımaqtarda aýa temperatýrasynyń kúrt tómendeýi kútilýde. Bul kúnderde aıazdy kúnder men qatty sýyq bolýy múmkin. Sonymen qatar, respýblıkanyń kóptegen bóliginde kóktaıǵaq pen tuman bolýy yqtımal.
Jeltoqsan aıynda aýa raıynyń kúrt ózgeristerin eskere otyryp, turǵyndarǵa saqtyq sharalaryn saqtaý usynylady. Qarly jáne burqasyndyq kúnderde jolda abaı bolý, úıler men ǵımarattardyń jylytý júıelerin tekserý, kólik quraldaryn daıyndaý mańyzdy.