Telegram messendjerinde adam basynyń sılıkon mýlájyna mıkrochıp engizý barysy kórsetilgen beınerolık taraýda. Qurylǵyny ıneniń kómegimen qulaqtyń artyna múldem kórinbeıtindeı etip ornalastyrady. Vıdeo astynda bárin osylaı chıpteıdi dep jazylǵan. Bul feık aqparat dep habarlaıdy, almaty-akshamy.kz Stopfake.kz silteme jasap.
Shyn máninde, rolıkte kórsetilgen manıpýlásıany janýarlarǵa arnalǵan shprıs-applıkatormen jasaıdy. Mundaı qurylǵylardy iri markepleısterde jáne veterınarlyq dárihanalarda satyp alýǵa bolady. Shprıske dıametri ádettegiden áldeqaıda keń qýys ıne salynǵan. Ol arqyly kólemi kúrish dánindeı ǵana chıp ótedi. Qurylǵynyń fýnksıonaldyǵy óte shekteýli – onda janýardyń jasy, shyǵý tegi jáne ıesi týraly aqparat, sondaı-aq joǵalǵan jaǵdaıda úı janýaryn tabýǵa bolatyn sáıkestendirý nómiri bolady. Bul derekterdi arnaıy skanerdiń kómegimen ǵana oqıdy. Adamdardy bulaı chıpteý maǵynasyz, onyń birneshe sebebi bar. Birinshiden, chıpte usynylǵan aqparat (mysaly, ıesi men tuqymy týraly málimetter) adamdarǵa qoldanylmaıdy.
Onyń ústine, dıametri úlken ıneni qulaqtyń artyna engizý jáne mundaı prosedýrany vaksınalaýmen shatastyrý múmkin emes. Immýndaýǵa arnalǵan preparattar, ádette, "delta" tárizdi bulshyq etke, ıaǵnı ıyqqa egiledi.
Búgingi tańda adamdar chıpterdi óz qalaýy boıynsha engize alady. Qurylǵylar aqparatty oqý qıyn bolatyn qulaqtyń artyna emes, alaqannyń syrt jaǵyna teri astyna salynady. Mundaı chıpterdiń fýnksıonaldyǵy da óte qarapaıym jáne olardyń kómegimen adamdy baqylaý múmkin emes. Bul týraly biz buǵan deıin jazǵan bolatynbyz.
Qoryta aıtqanda, vıdeoda janýarlarǵa jasalatyn manıpýlásıa kórsetilgen. Kadrlarda – veterınarlyq shprıs-applıkator. Ol vaksınalar men basqa da dári-dármek egiletin qarapaıym ıneksıalyq shprısten aıtarlyqtaı erekshelenedi. Planeta halqyn chıpteý konspırologıalyq teorıa bolyp tabylady jáne eshqandaı dáleli joq. Buǵan deıin biz qazaqstandyqtardy vaksınalaýǵa arnalǵan shprısterden chıpter tabylǵany týraly feıkti joqqa shyǵarǵan bolatynbyz. Ol rolıkte de veterınarlyq applıkatorlar kórsetilgen edi.