Nur Otan partıasy Almaty qalalyq fılıaly tóraǵasynyń orynbasary Qaırat Bısembaevtyń tóraǵalyǵymen «Baqytty otbasy» partıalyq jobasynyń Jol kartasyndaǵy «Otbasy men balalarǵa quqyqtyq qorǵaýdy qamtamasyz etý» 2.1 tarmaǵynyń oryndalýy boıynsha áleýmettik ál-aýqat, bilim, densaýlyq saqtaý, quqyq qorǵaý organdary jáne jedel áreket etý toptarynyń qatysýymen Otbasy, áıelder máseleleri jáne balalardyń quqyqtaryn qorǵaý jónindegi aımaqtyq qoǵamdyq keńesiniń otyrysy ótti, dep habarlaıdy Almaty-akshamy.kz
İs-shara barysynda Almaty qalasyndaǵy 8 aýdanda qurylǵan jedel áreket etý toptary moderatorlarynyń esebi qaraldy. Partıanyń Almaty qalalyq fılıaly tóraǵasynyń orynbasary Qaırat Bısembaev jedel áreket etý toptarynyń jumysyn odan ári kúsheıtý baǵytynda egjeı-tegjeıli túsindirip, jumystyń nátıjesin kóterýge baılanysty usynystar aıtty.
Sonymen qatar, jedel áreket etý toptarynyń maqsatyn, mindetin jáne uıymdastyrylý sharalaryn tolyqtaı túsindirip ótti. Qalada 2020 jyldyń 26 mamyrynan bastap jalpy 8 negizgi jedel áreket etý toptary men 102 kishi toptary qurylyp, jumystaryn júrgizýde. Osy toptardyń jumystarynyń arqasynda zorlyq-zombylyqqa tap bolǵan otbasylardyń jaǵdaılaryn jedel anyqtaýǵa jáne ýaqytynda qajetti kómek kórsetýge múmkindik týdy.
Sondaı-aq, Otbasy, áıelder jáne balalardyń quqyqtaryn qorǵaý máseleleri jónindegi qoǵamdyq keńes músheleri, jergilikti atqarýshy organdar jáne partıanyń aýdandyq fılıaldary birlese qaladaǵy qosymsha bilim berý mekemeleriniń balalarǵa qolaıly jaǵdaı jasaýy boıynsha júrgizilgen monıtorıń jumystarynyń qorytyndysy qaraldy.
Jalpy, bilim basqarmasyna qarasty 18 memlekettik qosymsha bilim berý mekemesi bar, onda qazirgi ýaqytta 14 899 bala oqıdy, onyń 925-i halyqtyń áleýmettik osal toptaryna jatady, bular: jetim balalar, múmkindigi shekteýli balalar men az qamtylǵandar. Bul toptaǵy barlyq oqýshylar tegin jáne jeńildetilgen sharttar boıynsha bilim alady.
Kezdesý sońynda pikir almasyp, barlyq týyndaǵan máseleler boıynsha qatysýshylarǵa túsiniktemeler berildi, usynystar aıtyldy.