Ulystyń uly kúni qarsańynda qos basylym – «Almaty aqshamy» men «Vechernıı Almaty» gazetteriniń oqyrmandary qýanyshqa keneldi. Úrdiske aınalǵan utys oıyny bıyl da jalǵasyn taýyp, jeńimpazdar esimi belgili boldy.
Jalpy, gazet oqyrmandary arasynda utys oıynyn ótkizý – qos basylymnyń uzaq merzimdi basymdyqtarynyń biri. Sondyqtan «Alataý aqparat» JSHS ujymy ótken jyly da gazetke jazylýshylar arasynda dástúrli «Jazyl da, utyp al!» atty baıqaýyn jarıalaǵan edi. Qala turǵyndary bul joly da utysqa qatysyp, baǵyn synamaqqa gazetke jazylǵanyn rastaǵan túbirtekterdi jibere bastady. Bıyl gazetke jazylýshylardyń qatary kóbeıip, sanynyń arta túskeni baıqaldy.
Jeńimpazdardy quttyqtaýǵa arnalǵan saltanatty is-sharada «Alataý aqparat» JSHS komersıalyq dırektory Qýanysh Dúskalıev baıqaýdyń ádil ári ashyq túrde ótkenin jetkizse, barlyq utys ıelerin «Alataý aqparat» JSHS dırektorynyń orynbasary Abýhalıl Djalılov pen «Almatý aqshamy» gazeti bas redaktorynyń orynbasary Ánýarbek Áýelbek, «Vechernyı Almaty» gazeti bas redaktorynyń orynbasary Evgenıı Rahymjanov quttyqtap, oqyrman men gazet arasyndaǵy altyn arqaýǵa aınalǵan baılanystyń mańyzdylyǵyna toqtaldy.
Utys jeńimpazdary da osyndaı úrdisti úzbeı ótkizip kele jatqan «Alataý aqparat» JSHS ujymyna rızashylyqtaryn bildirdi.
– Men uzaq jyldan beri bilim salasynda qyzmet etken janmyn. «Almatý aqshamy» gazetine 1988 jyldan beri jazylamyn. Tipti, gazetke jazylǵanym jónindegi túbirtekterdiń bári áli kúnge saqtaýly. Men jalpy ustaz bolǵandyqtan, tól basylymymyz «Almatý aqshamy» gazetine úzbeı jazylyp, bir betin qaldyrmastan oqyp otyrýdy ádetke aınaldyrǵan janmyn. Qazirgi kezde qurmetti eńbek demalysyna zeınetke shyqsam da, súıikti basylymnan qol úzgen emespin. Kóbine úıde otyrǵandyqtan, gazetti eleńdep kútetin boldym. Osy gazet arqyly shaharymyzda bolyp jatqan barlyq jańalyqty bilip, qulaǵdar bolyp otyramyn. Búgingi utysta shańsorǵysh utyp aldym. Bul da bir úı tirshiligine qajetti, paıdaly dúnıe ǵoı, – deıdi oqyrmanymyz, utys jeńimpazy Sulýjan Jolymbetova.
– Men qalalyq «Áleýmettik baǵdarlamalar jáne jumyspen qamtý» basqarmasyn 27 jyl basqarǵan adammyn. Sol kezde gazetpen de, onyń tilshilerimen de tyǵyz baılanysta boldym. Jalpy, gazettiń 1978 jyldan bergi turaqty oqyrmanymyn. Turǵyndarǵa qajetti aqparattardy osy gazet arqyly der kezinde jetkizip otyrdyq. Búginde zeınettemin, áli de gazetpen baılanysym úzilgen emes. Bul joly túbirtekti utysqa meniń nemerem jibergen edi. Iaǵnı bul gazetti tek zeınetkerler ǵana emes, jastardyń da oqıtynyn kórsetse kerek, – deıdi qoǵam qaıratkeri, utys ıesi Amangeldi Nurlanov.
Sondaı-aq, utysqa ıe bolǵan «Almaty aqshamy» gazetiniń oqyrmandary – N.Esim bekov «SUPRA» mýltıvarkasyn, R.Tezekbaeva «AVM-20W» qysqa tolqyndy peshin, «Vechernıı Almaty» gazetiniń oqyrmandary T.Galanseva «SUPRA» mýltıvarkasyn, E.Zınoveva «AVM-20W» qysqa tolqyndy peshin utyp aldy.