Naýryz meıramy qazaqstandyqtar úshin jańa jyldyń bastalýyn bildiretin tereń mádenı jáne tarıhı mańyzǵa ıe. Tarıhı turǵydan qarasaq, kóktemniń kelýin toılaý 8-9 kúnge sozylyp, «Naýryznama» dep atalǵan. Bıyl qazaqstandyqtar Naýryz meıramyn jańa tujyrymdama boıynsha toılaıtyn bolady.
«Prostor» jýrnalynyń bas redaktory, Qazaqstan Jazýshylar odaǵynyń múshesi Farhat Tamendarov Naýryz meıramynyń mańyzdy bóligi otbasylyq basqosýlar men otbasylyq ortadaǵy qarym-qatynas ekenin atap ótti. Sol sekildi Tamendarovtar otbasynda da merekede bas qosyp, dastarhan jaıyp, ulttyq taǵamdar daıyndaý dástúrge aınalǵan.
Jańa tujyrymdamaǵa qatysty sarapshy Naýryz meıramyn toılaýdyń jańa formaty qazaqstandyq qoǵamnyń rýhy men yntymaǵyn nyǵaıtady dep esepteıdi. Sondaı-aq ol dástúrli kıimdi qaıta jańǵyrtýdyń oń úrdisin de atap ótti.
«Memleket basshysynyń bastamasymen úshinshi Quryltaıda aıtylǵandaı, naýryzdyń 14-i men 23-i aralyǵynda Naýryz meıramyn toılaımyz. Men bul ıdeıany tolyǵymen qoldaımyn, óıtkeni bizge halyqty biriktiretin, onyń biregeıligin kórsetetin ulttyq mereke kerek. Bıyl ulttyq kıimderge erekshe kóńil bólingeni, tek qazaqtyń ulttyq kıimderin ǵana emes, respýblıkamyzdyń búkil kóp ultty halqynyń kıimderin kórý maǵan erekshe unady jáne oǵan rıza boldym. Bul mereke men úshin tabıǵattyń jańarýyn, shyǵys kúntizbesi boıynsha jańa jyldyń bastalýyn bildiredi. Osy kezeńde aıtylǵan tilekter aǵashtardaǵy gúlderdeı búrshik atyp, jemisin beretini sózsiz», - dedi F.Tamendarov.
2024 jyly Naýryz meıramyn toılaýdyń jańa formaty on kún – 14-23 naýryz aralyǵynda ótetin bolady. Naýryznamanyń onkúndigi ulttyq kıimderden bastap, qazaq halqynyń mádenıeti men ádet-ǵurpyna deıin qoǵamnyń barlyq salasyn qamtýǵa arnalǵan.