Almatylyq sarapshy Naýryz meıramyn toılaýdyń jańa formaty jaıynda
2024 jyly elimizde Naýryz meıramy jańa formatta ótedi. Qazaqstandyqtar endi kóktemniń kelýin 10 kún – 14-23 naýryz aralyǵynda toılaıdy. «Naýryznamanyń» onkúndiginiń ár kúni qoǵamynyń ulttyq bolmysy men alýan túrliligin kórsetetin belgili bir taqyryptarǵa arnalady, dep habarlaıdy almaty-akshamy.kz.
Zıaly qaýym ókilderi ózgeristerdiń qazirgi qoǵamda dástúrli merekeniń saqtalýyna jáne damýyna septigin tıgizetindigin biraýyzdan atap ótti.
Aqyn, aýdarmashy, jýrnalıs, Qazaqstan Jazýshylar odaǵynyń, Ulttyq Quryltaıdyń múshesi Lúbov Shashkova merekeniń jańa formaty Naýryzdyń mádenı aspektilerine kóbirek nazar aýdarýǵa múmkindik berip, mádenı almasý men ulttardyń birigýine múmkindikter týǵyzatynyn atap ótti.
«Qazirgi Naýryzdy toılaýdy Atyraýda ótken Ulttyq Quryltaıdyń úshinshi otyrysynda bastap kettik. Sol kezde bul merekeniń jańa formaty men mazmuny aıqyndaldy. 22 naýryzda kún men túnniń teńeletin kúni toılanatyn ǵasyrlar qoınaýyndaǵy meıram. Uzaq qystan, kóktem kelip, aǵaıyn-týys bas qosyp, bir-birimen kórisedi. Bul kúndi quttyqtaý jáne alǵys aıtý kúni desekte bolady. Osylaısha ár kún jańa maǵynalarǵa toly boldy. Bıyl Almatyda merekeniń toılanýy unady. Merekelik sherýdi ótkizý tamasha ıdeıa – kúımelerdiń, kıiz úılerdiń, túıe kerýenderiniń qozǵalysy, ıaǵnı munyń bári bizdi ulttyq tarıhpen, ata-babalarymyzben, túp-tamyrymyzben baılanystyratyn ǵasyrlar boıyna jalǵasatyn merekege shyn máninde dem berip, salt-dástúrlerimiz ben ádet-ǵuryptardy saqtaýǵa shaqyrady», - dep bólisti L.Shashkova.
Sondaı-aq ol Naýryz meıramynyń tabıǵatpen tyǵyz baılanysty ekenin, onyń kelýi qorshaǵan ortany aıalaý kerektigin eske túsiretinin aıtty. Máselen, Naýryz meıramynda qorshaǵan ortany tazalaý, aǵash otyrǵyzýmen qatar, tabıǵatqa, onyń syı-syıapatyna taǵzym etý retinde erteden kele jatqan bulaqtyń kózin ashý rásimi oryndalady.
Esterińizge sala keteıik, Naýryz meıramyn toılaý jańa tujyrymdama boıynsha ótip jatyr. Oǵan sáıkes, jyl saıyn naýryzdyń 14-i men 23-i aralyǵynda qoǵamnyń barlyq salasyn qamtýǵa arnalǵan Naýryznama onkúndigi ótedi.
Búgin 22 naýryz - Jańa jyl. Bul kúni elimizdiń barlyq aımaqtarynda etnoaýyldar qurylyp, ulttyq mádenı-sporttyq sharalar, túrli jármeńkeler ótkizilýde.
23 naýryz – Tazarý kúni. Jańa jyldy jańa maqsatpen, jańa úmitpen qarsy alýdyń sımvoly retinde Naýryznamanyń sońǵy kúni retinde belgilengen. Bul kúni Qazaqstannyń barlyq aımaqtarynda jalpyulttyq ekologıalyq aksıa ótedi.