Aldaǵy kúnderi kún raıy kúrt kóterilip, aptap ystyq kútilýde. Mundaıda kún kózinde kóp júrýdiń ózi densaýlyqqa zıanyn tıgizedi. Sondyqtan qala kórkin árlendirip turǵan sýburqaqtar janynan tabylý óte paıdaly.
Jalpy, Almaty qalasynda eń alǵashqy sýburqaq 1948 jyly Abaı atyndaǵy opera jáne balet teatry ǵımaraty janyndaǵy baqta paıda bolǵan. Onyń avtory - sáýletshi V.Stesın.
Odan keıin, 1958 jyly, QazKSR-niń Úkimet úıi qazirgi Qazaq-Brıtan tehnıkalyq ýnıversıtetiniń ǵımaratynyń eki qaptalynan tabaq úlgisindegi qyzyl granıt taspen órnektelip, keshke jaqyn túrli-tústi shamdarmen janatyn sýburqaq boı túzepti. Bul keremet fontannyń avtory - sáýletshi A.Levınson.
Al 1968 jyly sáýletshi V.Panın jasaǵan aýmaǵy 480 sharshy metr, shapshý bıiktigi 6 metr «Myń tamshy» sýburqaǵy sol kezdegi taptyrmas demalys ornyna aınalǵan. Araǵa tórt jyl salyp, ıaǵnı 1972 jyly Abaı atyndaǵy opera jáne balet teatrynyń batys jaǵynan «Aptalyq» dep atalatyn sýburqaq salyndy. Bul sýburqaq tizbesiniń avtory - sáýletshi M.Safın. Osy rette aıta keterlik bir jaıt, aradan alty jyl ótkende Bógenbaı batyr kóshesindegi «Baqbaq gúl» sýburqaǵynyń da avtory - osy M.Q.Safın. Al 1967 jyly sáýletshi P.Kartası jasaǵan sýburqaq «Almaty» qonaq úıiniń ajyramas bólshegi deýge bolady. Onyń aýdany 800 metr, sýdyń shapshý bıiktigi 3-6 metr. Almaty qalasyn kórkeıtýge jáne qaıtalanbas erekshe sýburqaqtar jasaýda sáýletshi V.Kasevtiń qosqan úlesi zor. İri ǵımarattarmen birge turǵyzylǵan ásem sý haýyzdary men sýburqaqtarynyń arasynan Dostyq dańǵylynda ornalasqan «Qazaqstan» qonaq úıi mańyndaǵy sýburqaqty erekshe ataýǵa bolady.
E.Rahmadıevtiń avtorlyǵymen 2005 jyly Kóktóbede paıda bolǵan «Alma» sýburqaǵy Almatynyń basty sımvoly retinde esepteldi.
Búginde Almaty qalasynda 128 sýburqaq bar, onyń 63-i komýnaldyq menshikte, 65-i jeke menshikte. «Eco Almaty» JSHS 63 komýnaldyq sýburqaqqa qyzmet kórsetedi. Qaladaǵy eń úlken Almatydaǵy Tuńǵysh Prezıdent saıabaǵynda ornalasqan eń úlken sýburqaq 8 myń sharshy metr aýmaqty alyp jatqan sý qurylymy iske qosylý úshin úsh tonna sý qajet. Fontannyń eń uzyn bóliginen shyǵatyn sý 32 metr bıiktikke deıin jetedi. Ol saıabaq arkasynda ornalasqan týdyń deńgeıimen teńesedi.
