Almaty qalasy, Almaty jáne Jetisý oblystary boıynsha qylmystyq-atqarý júıesi departamentine qarasty №11 mekeme ókilderi Jambyl atyndaǵy memlekettik jasóspirimder kitaphanasy qyzmetkerlerimen birlesip, belgili aqyn, halyqaralyq «Alash» ádebı syılyǵynyń laýreaty, «Daryn» jastar syılyǵynyń ıegeri, Qazaqstan Respýblıkasy Prezıdentiniń 4 márte stıpendıaty Maraltaı Raıymbekulymen rýhanı kesh ótkizdi.
Keshte aqyn rýhty jyrlaryn oqydy. Aıaǵyn jaza basyp, isti bolǵan jastarǵa adamgershilik, dostyq, qaıyrym, meıirim taqyryptarynda syr shertip, olardy jaqsylyqqa úndedi. Bozbalalar meımannyń áserli áńgimesin uıyp tyńdady, kókeıde júrgen saýaldaryn da qoıdy. Aqynnyń óleńderi olarǵa oı salǵany anyq.
Jalpy, túzetý kolonıasynda mundaı keshter jıi uıymdastyrylyp turady. Sebebi, jazaly jasóspirimderdi ótken kúnmen emes, aldaǵy kúndermen ómir súrýge, jaqsy kúnderden kúder úzbeýge úndeý – basty mindet.