«Bul baǵytta Mınıstrlik tıisti jumysty bastap ketti. Negizgi respýblıkalyq búdjettik komısıanyń otyrysynda qaralǵan bul másele. Oń sheshimin tapqan bolatyn. Bul jospar 2026 jyldyń 1 qańtarynan bastap engizýdi josparlap otyrmyz. Sonymen qatar 2-tolqyn ishinde jattyqtyrýshylardyń eńbekaqysyn odan ári arttyrý maqsatynda Mınıstrlik tıisti jumystardy júrgizip, jańartylǵan biryńǵaı sporttyq standarttar boıynsha baǵdarlamalardy iske asyrǵany úshin ortasha eńbekaqysyn shamamen 30%-ǵa arttyrady degen senimdemiz», – dedi vıse-mınıstr.
Sondaı-aq bul jumysty sıfrlandyrý kózdelip otyr. Máselen, «Dene shynyqtyrý jáne sporttyń (E-sport) sıfrlyq platformasyn» iske asyrý sheńberinde byltyr pılottyq rejımde 3 negizgi modýl iske qosyldy. Onyń ishinde «Sportshylardyń, jattyqtyrýshylardyń, tóreshiler men ádiskerlerdiń pasporttarynyń biryńǵaı bazasy», «Sporttyq-buqaralyq is-sharalardyń «elektrondyq kúntizbesi», «Sport nysandarynyń biryńǵaı tizilimi» jobalary bar.
Aıta keterligi, dene shynyqtyrý men sportty basqarý júıesin jetildirýdiń oblystardyń, respýblıkalyq mańyzy bar qalalardyń jáne astananyń sportshylaryn daıarlaýdy júzege asyratyn óńirlik dene shynyqtyrý-sport uıymdaryn, joǵary jetistikter sportyn damytýdy ýákiletti organnyń quzyretine berý qarastyrylýda. Sport salasynyń basqarý júıesindegi jańashyldyqtar men kúrdeli zańnamalyq ózgerister elimizdiń halyqaralyq arenadaǵy bedelin odan ári nyǵaıtýǵa tyń serpin beredi. Qazirgi tańda vedomstvo Balalar, jasóspirimder joǵary sport mektebi, sport-ınternat mektepteri, Olımpıadaǵa daıarlaý ortalyqtaryn óńirlik deńgeıden respýblıkalyq deńgeıge aýystyrý jumystaryn júrgizip jatyr.