Jat eldegi erlik

7 sáýir – tájik-aýǵan shekarasyn qorǵaýda 17 sarbaz erlikpen qaza bolǵan kún

Týra 30 jyl buryn Qazaqstan Respýblıkasy Joǵarǵy Keńesiniń Qaýlysymen  1993 jyldan 1998 jylǵa deıin İshki áskerdiń jedel maqsattaǵy áskerı bólim­deriniń 20 qurama rota –  2 myńnan asa sarbazy men ofıseri Qazaqstan Respýb­lıkasy jeke atqyshtar qurama batalónynyń quramynda tájik-aýǵan shekarasyndaǵy jaýyn­gerlik tapsyrmalardy oryndaýǵa attanǵan edi. 1995 jyldyń 7 sáýiri ishki ásker sarbazdary úshin qaraly kún boldy.

Pshıhavr shatqalyndaǵy Pándj ózeniniń boıynda İshki áskerdiń rotasyna Aýǵanstan jaǵynan modjahedter shabýyl jasap, 17 sarbaz qaza taýyp, 33 adam jaralandy. Osy qandy shaıqasta İshki ásker jaýyngerleri janqıarlyq pen qaharmandyq kórsetip, ás­kerı boryshyn óteý jolynda jat jerdiń shebin qorǵaý úshin janyn qıdy.

Tájik halqyna kórsetken kómegi úshin qazaqstandyq jaýyngerlerge qurmet retinde Dýshanbede monýment turǵyzyldy. Astana qalasynda «Otan-Ana» monýmenti qasynan İshki áskerdiń 17 sarbazyna arnalǵan aleıa ashylyp, eskertkish baǵana ornatylǵan. So­nymen qatar Shymkent, Petropavl jáne basqa da qalalarda batyrlarǵa arnalǵan es­kertkish bar.

İshki áskerdiń qazirgi Qazaqstannyń Ult­tyq ulany batyr jaýyngerlerin eshqashan umytpaıdy. Ulttyq ulandyqtar jyl saıyn 7 sáýirde «Erlik kúnin» atap ótedi. Bul shara bıyl da uıymdastyryldy. Qaladaǵy árbir áskerı bólimde eske alý jıyny ótti. Solar­dyń biri – 5572 áskerı bóliminiń bazasynda­ǵy kezdesý. Keshe áskerı bólimge tájik-aýǵan shekarasyn qorǵaýǵa attanǵan sarbazdar, Ulttyq ulan «Ońtústik» óńirlik qolbasshy­lyǵynyń basshy quramy, Ulttyq ulan arda­gerleri, 5572 áskerı bóliminiń jeke quramy qatysyp, 17 sarbazǵa qoıylǵan erkertkish- taqtaǵa gúl shoqtaryn qoıdy, erlikterin eske aldy.

«Búgin – erlik kúni, sol erlikke taǵzym kúni. 7-rotanyń komandıri men boldym. Ol kezde kapıtan sheninde edim. Sarbazdardyń áskerge kelgeni, shaıqasqa daıyndyǵy, sol kúngi erligi kóz aldymnan ketpeıdi. Ókinish­ke qaraı, sarbazdarymyzdyń bári jastaı ómirden ozdy. Arasynda áli 20 jasqa tol­maǵandary da bar edi. Qyrshyn ketken jastardyń 12-si QR Prezıdentiniń «Jaýyngerlik erligi úshin» medali, 5-i «Aı­byn» ordenimen nagradtaldy», – deıdi tájik-aýǵan shekarasynda Otan aldyndaǵy boryshyn atqarǵan zapastaǵy polkovnık Erlan Jarylqasynuly.

Tájik-aýǵan shekarasynda jaýyn­gerlik tapsyrmalardy oryndaýǵa attan­ǵandardyń biri, qaza tapqan sarbazdar­men 7-rotada birge bolǵan Jumahan Shashýbaevtyń aıtýynsha, qansha jyl ótse de, sol shaıqas áli kóz aldynan ket­peıdi.

«7 sáýir kúni túski saǵat 12-de shaıqas bastaldy. Pshıhavr shatqalynan túsip qaldyq. Urys saǵat 12-den keshki saǵat 18-ge deıin jalǵasty. Bastalǵan sátte kolonna kelip toqtady. Birinshi «VAZ» avtokóligi jarylyp, urys bastalyp ketti. Sol shaıqas ústinde 17 sarbazy­myzdan aıyrylyp qaldyq. Otandy qorǵaý úshin, tájik-aýǵan shekarasyndaǵy shıe­lenistiń zardaby bizdiń elge de tımes úshin óz erkimizben bizdiń rotadan 100 sarbaz attanǵan edik», – dep eske aldy.

Nıaztaı BOLATULY, QR Ulttyq ulany «Ońtústik» óńirlik qolbasshyly­ǵynyń tárbıe jáne áleýmettik jónindegi orynbasary, polkovnık:

– Búgin Ulttyq ulannyń barlyq áskerı bóliminde «Erlik pen taǵzym» atty is-shara ótkizilip jatyr. Basty maqsaty – 1995 jyly Tájikstan shekarasyndaǵy burynǵy İshki ásker, qazirgi Ulttyq ulannyń erlikpen qaza tapqan 17 sarbazyn eske alý. Mundaı shara jyl saıyn ótkiziledi. Sol jyldary áskerde qyzmet etken 46 jaýyngerimiz bar. 7-rotada qyzmet etken Qazaqstan boıynsha 76 zapastaǵy áskerler bar. Osy batyrlar­dyń erligine taǵzym etip, ardagerlerdi sha­qyrdyq. Munyń túp negizi – áskerı-patrıot­tyq tárbıe berý.