Jazdyń úsh aıy ishinde «Jasyl el» jastar eńbek jasaǵynyń jaýyngerleri ekologıalyq aksıalarǵa qatysyp, qalany tazalaýmen jáne abattandyrýmen aınalysatyn bolady. Bul týraly Óńirlik komýnıkasıalar qyzmetiniń alańynda Almaty qalasynyń Jastar saıasaty basqarmasynnyń ókilderi aıtty, dep habarlaıdy almaty-akshamy.kz
Jobanyń negizgi maqsaty – jastardy ýaqytsha eńbekpen qamtý, jastar arasynda ekologıalyq tárbıeni nasıhattaý, olardyń tabıǵatqa qamqorlyqpen qarap, týǵan elge degen súıispenshiligin qalyptastyrý.
«Bıyl 2100-ge jýyq almatylyq jas ýaqytsha eńbekpen qamtylady. Endi osy jastarymyz aldaǵy ýaqytta qalamyzdy kógalandyrýǵa, kórkeıýine óz úlesterin qosatyn bolady. Prezıdentimiz Qasym-Jomart Toqaev óz sóz sózinde «Jastar arasynda ekologıalyq mádenıetti qalyptasyrý qajet» dep atap ótti. Mine «Jasyl el» osyndaı jobalardyń biri» - deıdi Almaty qalasy Jastar saıasaty basqarmasynyń jastardy áleýmettendirý jáne jastar bastamalaryn qoldaý bóliminiń basshysy Nursultan Bekqaıyrov.
Sonymen qatar, joba aıasynda eńbek etýshi jastar qoǵamdyq jumystarǵa tartylyp, túrli qaıyrymdylyq sharalaryna qatysatyn bolady.
Jobaǵa qatysýshylardyń jalaqysy 85 myń teńgeni (ETJ) quraıdy. Sonymen qatar, ulttyq joǵary oqý oryndary óz stýdentterine qosymsha tólemder qarastyryp otyr: QazUPÝ – 100 myń teńge, QazUAÝ – 110 myń teńge, Q.I. Satpaev atyndaǵy QazUTZÝ – 100 myń teńge, Ál-Farabı atyndaǵy QazUÝ – 80 myń teńge.
Qazirgi tańda, joba aıasynda 700-ge jýyq jas almatylyqtar jumysyn bastady. Jumys maýsymy bastalǵaly beri 34 eko-aksıa, 20-dan astam trenıńter men nusqaýlyqtar jáne 13 «Jas Eko Patrúl» reıdteri ótkizildi.
Reıdter barysynda 85 quqyq buzýshylyq anyqtaldy. Sondaı-aq, anyqtalǵan problemalardy joıý jáne olardyń sheshilýin jedeldetý úshin, memlekettik organdarǵa 40-tan astam ótinish jiberilip, 48-den astam shaǵym jazyldy. Osy oraıda ruqsatsyz qoqys úıindileriniń 10-y jergilikti atqarýshy organdardyń kúshimen joıyldy.
«Esterińizge sala keteıik, «Jasyl el» jobasy elimizde 2005 jyldan bastap júzege asyrylyp kele jatyr. Sodan beri jastarymyz jyl saıyn dástúrli túrde ýaqytsha jumyspen qamtylyp, ekologıalyq sharalarǵa qatysyp, elimizdiń kórkeıýine, boıyndaǵy kúsh jigeri men áleýetin ózine, tıisinshe qoǵamǵa paıdasyn tıgizýge baǵyttap keledi», - dep túıindedi N.Bekqaıyrov.