Jumyspen qamtylmaǵan jastarǵa arnalǵan «Akselerator» jobasynyń 50 qatysýshysyna óz jobalaryn iske asyrý úshin memlekettik grant berildi.
Atalmysh shara «Almaty Resort» shıpajaıynda ótti. «Jas Camp Almaty» jastar lagerinde 50-den astam jastar ózderiniń bıznes josparyn iske asyrýǵa múmkindik aldy. Olarǵa 1 mln.teńge kóleminde memlekettik granttardy Almaty qalasynyń ákiminiń orynbasary Arman Qyryqbaev saltanatty túrde tabystap, óz quttyqtaýyn aıtty.
Bul joba bıznesti basqarý salasynda jańa bilim alý, jobalardy iske asyrý joldaryn anyqtaý jáne olardy oryndaý úshin qajetti resýrstardy tabý arqyly qalanyń jumyspen qamtylmaǵan jastaryn qoldaýǵa baǵyttalǵan.
«Jobaǵa tirkelgen jumyssyz mártebesi bar 1000-nan astam jas balalar qatysty, olardyń 100-i bes kún ishinde «Almaty Resort» kesheniniń bazasynda bilikti tálimgerler men jattyqtyrýshylardan sheberlik synyptarynan ótti», – deıdi sharanyń uıymdastyrýshysy Aqylbek Dosjan.
Oqytý barysynda qatysýshylar kásipker retinde qajetti daǵdylar men kásipterdi úırenýge, qoǵamdaǵy táýelsiz ómirge beıimdelýge jáne óz oılaryn júzege asyratyndaı paıdaly daǵdylardy ıgerýge erekshe nazar aýdaryldy.
«Jastarǵa qoldaý bildirip, qarjylaı kómek bildirgen Almaty qalasynyń ákimdigine alǵys bildiremiz. Men ortopedıalyq matras jasaıtyn seh ashý úshin bıznes qurǵan bolatynmyn. Minekeı, ony júzege asyrý úshin qarjy da alyp jatyrmyn. Dostar da taýyp jatyrmyn», – dedi almatylyq qatysýshy.
Aıta keteıik, is-sharany «Almaty qalasynyń jastar saıasaty basqarmasy» KMM uıymdastyrdy.
